Ægismenn björguðu ferðafólki úr Jökulgilskvísl

Félagar úr Björgunarsveitinni Ægi í Garði, sem voru að ljúka Hálendisvakt, brugðust skjótt við í gær þegar hjálparkall barst frá ferðafólki sem hafði fest bíl sinn á leið yfir Jökulgilskvísl, rétt vestan við Kýlinga á Fjallabaksleið nyrðri.

Þegar að var komið var fólkið komið út úr bílnum og hélt til á þaki hans. Björgunarmaður með straumvatns björgunarbúnað óð til þeirra og aðstoðaði fólkið í land. Þau voru gegnblaut. Mikið vatn hafði flætt inn í bíl þeirra og ferðafólið var talsvert kalt. Þau voru vafin í ullarteppi þegar þau komu í land og færð í bíl björgunarsveitarinnar. Bíll fólksins var svo losaður úr ánni.

Björgunarfólki tókst að gangsetja bílinn og var hann fluttur ásamt ferðalöngunum, að aðstöðu Hálendsivaktarinnar í Landmannalaugum, þar sem þeirra beið heitt kakó og vel kynt hús.

Félagar í Björgunarsveitinni Suðurnes hafa nú tekið við hálendisvaktinni og eru með bækistöð í Landmannalaugum.