Æfingaaðstaða slökkviliðs lögð í rúst

Æfingaaðstaða slökkviliðs Brunavarna Suðurnesja hefur verið lögð í rúst af skemmdarvörgum. Tjónið er mikið en allt hefur verið brotið og eyðilagt sem hægt er að eyðileggja. Slökkviliðið hafði útbúið æfingaaðstöðu í gömlu sorpeyðingarstöðinni við Hafnaveg. Óvíst er hvort hún verður endurnýjuð.

Í gömlu sorpeyðingarstöðinni hafði verið útbúin aðstaða til reykköfunar, auk þess sem á svæðinu voru fjölmargir æfingagámar frá Brunamálastofnun. Einnig var farið inn í gámana og þar unnar skemmdir.

Ólafur Ingi Jónsson, verkefnastjóri hjá Brunavörnum Suðurnesja, sagði í samtali við Víkurfréttir að tjónið væri mikið. Aðstaða fyrir slökkviliðsmenn á æfingum hafi verið innréttuð og húsið lagað að aðstæðum m.a. til reykköfunar.

Nýverið voru allar rúður í húsinu brotnar. Við því var brugðist með því að negla plötur fyrir gluggana. Þegar skemmdarvargarnir voru á ferðinni í síðustu viku eða um síðustu helgi voru plöturnar allar rifnar frá. Allar hurðar voru brotnar upp og innréttingar voru rifnar niður af veggjum. Þá voru brotin göt á veggi. Glerbrot eru út um allt og spilliefnum var helt niður.

Farið var inn í gáma frá Brunamálastofnun og þar unnar skemmdir. Skemmdarvargarnir mega þakka fyrir að hafa ekki farið sér að voða en rafmagn er á húsinu og talsvert var átt við raflagnir og tenglabox. Þeir sem hafa orðið varir við grunsamlegar mannaferðir við gömlu sorpeyðingarstöðina við Hafnaveg eru hvattir til að láta lögreglu vita.