Aðalfundur SSS: Samvinna sveitarfélaga í brennidepli

Samvinna sveitarfélaga á Suðurnesjum eru í brennidepli á aðalfundi Sambanda sveitarfélaga á Suðurnesjum sem stendur nú yfir í húsnæði Keilis á Vallarheiði. Þar eru saman komnir sveitarstjórnarmenn, þingmenn og aðrir til að ræða mál tengd Suðurnesjum.

Í niðurlagi formanns stjórnar SSS, Steinþórs Jónssonar, sagði hann að hann teldi að endurskoða þyrfti samstarfið frá grunni „og jafnvel hætta því í núverandi mynd, t.d. í kjölfar frekari sameiningar sveitarfélaga.“

Fjölmargar ályktanir voru samþykktar í morgun, þar á meðal var skorað á stjórnvöld að fjármunir sem falla til ríkissjóðs frá Suðurnesjum, þar á meðal vegna sölunnar á Hitaveitu Suðurnesja og fjármagnstekjur vegna sölu fasteigna á gamla varnarsvæðinu, renni til uppbyggingar á svæðinu. Þá lýsir aðalfundurinn yfir fullum stuðningi við fyrirhuguð áform um byggingu álvers í Helguvík. Hvað varðar samgöngumál leggur fundurinn áherslu á að staðið yrði við loforð um að lokið yrði við gerð Suðurstrandarvegar, tvöföldun Reykjanesbrautar verði framhaldið að Flugstöð Leifs Eiríkssonar og inn í Hafnarfjörð. Einnig var ályktað að byggingu nýrra höfuðstöðva lögreglunnar á Suðurnesjum, yrði lokið ekki síðar en árið 2009, stjórnvöld bregðist við vanda vegna skerðinga á þorskaflaheimildum sem og bágri stöðu hafna landsins. Einnig var ítrekað að efla þurfi heilsugæslu á svæðinu og að fyrirheit ríkisvaldins um nýtt hjúkrunarheimili í Reykjanesbæ verði efnt.

Nánari fréttir af fundinum síðar...

VF-mynd/Þorgils