64 síður af brakandi ferskum Víkurfréttum

Víkurfréttir eru komnar út. Þetta er tólfta blaðið sem við gefum eingöngu út rafrænt og sem fyrr þá kennir ýmissra grasa í Víkurfréttum vikunnar.

Forsætisráðherra kemur við sögu í blaði vikunnar en Katrín Jakobsdóttir fékk fallega gjöf sem Jónatan Jóhann Stefánsson færði henni í forsætisráðuneytinu á dögunum. Katrín fékk sérprjónaða VG-lopapeysu en Jónatan hefur átt samskonar peysu í nokkra mánuði. Peysa Jónatans vakti athygli Katrínar þegar hún mætti á fund til Reykjanesbæjar í vetur. Allt um þetta í blaðinu.

Sólborg Guðbrandsdóttir stefnir að bókaútgáfu um jólin. Hennar hugarfóstur er verkefni sem heitir Fávitar. Við ræðum við Sólborgu um Fávita og fyrir hvað það stendur.

Mannlífið blómstrar í Víkurfréttum. Við förum á Garðskaga og hittum fyrir Mörtu Eiríksdóttur sem þar bauð upp á sannkallaða gyðjugleði. Skemmtilegar myndir þar.

Ingi Þór kíkti í plötuskápinn og valdi fyrir okkur sínar fimm uppáhaldsplötur.

Hvatningarverðlaun Reykjanesbæjar voru afhent í vikunni. Við vorum þar og gerum verðlaunaafhendingunni góð skil í blaðinu í máli og myndum. Þá má horfa á viðtal við aðalverðlaunahafana í spilara í blaðinu. Já, þessi rafrænu blöð bjóða upp á möguleika sem prentuðu blöðin eru ekki með.

Í blaðinu er rætt við skólastjóra Fisktækniskólans sem segir mikla eftirspurn eftir fisktækni á pólsku.

Við segjum einnig fréttir af fasteignamarkaði og segjum frá nýrri skólpdælustöð sem einnig verður útsýnispallur. Þá er greint frá nýju skeiði í starfsemi Kadeco, þrónunarfélagi Keflavíkurflugvallar.

Í blaðinu eru mannlífsmyndir frá opnun sýninga í Duus Safnahúsum. Þar hafa verið opnaðar sumarsýningar.

Netspjall er liður sem hefur notuð vinsælda hjá okkur í blaðinu á síðustu vikum þar sem Suðurnesjafólk svarar fjölbreyttum spurningum blaðamanna. Nokkur slík viðtöl eru í blaði vikunnar.

Við mynduðum stökkvandi rallýbíla í Reykjanesbæ og auðvitað má sjá stökkin á myndskeiði í blaðinu!

Fótboltinn er að rúlla af stað og í þessu blaði byrjum við að kynna Suðurnesjaliðin til leiks. Þá eru myndir frá Nettómóti stúlkna í 7. flokki og umfjöllun um golf.

Sitthvað fleira er einnig í blaðinu. Margeir Vilhjálmsson slær svo botninn í umræðuna með Lokaorðum.

Eins og sagt er frá í upphafi þessa pistils er þetta tólfta rafræna blaðið frá Víkurfréttum og alls eru síðurnar orðnar 800 talsins á þessum tólf vikum.