15 til 20 hundar æddu geltandi á móti hlaupurum

Hópur af hundum, á milli 15 til 20 hundar, æddu geltandi á móti hjónum sem hlupu meðfram hitaveitulögninni frá Grindavík til Fitja í Reykjanesbæ. Þetta gerðist örfáum dögum eftir að hópur hunda réðust á konu á Miðnesheiði og bitu.

Jóhann Júlíusson símsmiðameistari og eiginkona hans, María Jóhannesdóttir íþróttakennari, hlupu fyrir helgi eftir vegi sem liggur með hitaveitulögn milli Grindavíkur og Njarðvíkur. Jóhann greinir frá lífsreynslu þeirra hjóna á Facebook-síðu sinni.

Þar segir hann að þau María hafi mætt fólki sem var „með 15 til 20 lausa hunda sem komu æðandi á móti okkur geltandi. Maður varð skíthræddur,“ segir Jóhann sem var kominn með stóran stein í hendurnar tilbúinn að berja þá af sér.

„Fólkið var ekkert að kalla á hundana til sín eða að reyna að hemja þá. Alveg ótrúlegt að fólk skuli ekki passa betur upp á að setja dýrin sín í taum þegar það mætir öðru fólki,“ segir Jóhann Júlíusson í Facebook-færslunni.

Í síðustu viku varð kona úr Keflavík fyrir því að sautján hundar hópuðust í kringum hana þegar hún fór til eggja á Miðnesheiði. Hún var einnig bitin af hundunum og hlaut nokkur djúp bitsár. Það mál er til meðferðar hjá lögreglunni á Suðurnesjum og heilbrigðiseftirliti Suðurnesja.