12.000 manns skoðuðu hvalinn um helgina

Stanslaus straumur fólks var á Garðskaga og að Kirkjubólsvelli um helgina til að skoða hvalhræ sem rak þar upp í fjöru í síðustu viku. Íbúar við Garðskaga segja að þar hafi verið stöðug traffík frá því klukkan tíu í gærmorgun og fram yfir myrkur í gærkvöldi. Sama á við um laugardaginn en þá traffíkin aðeins minni. Umferðaröngþveiti var á Garðskaga og eins við golfskálann við Kirkjubólsvöll.

Óformleg talning var gerð í gær á þeirri umferð sem gekk eftir fjörukambinum frá Garðskaga og að Kirkjubóli. Þegar þeim sem gengu fjöruna og lögðu bílum sínum við golfvöllinn að Kirkjubóli er bætt inn í útreikninga er varlega áætlað að um 8.000 manns hafi lagt leið sína að hvalnum í gær, sunnudag. Á laugardaginn var umferðin eitthvað minni en varlega áætluð um 4.000 manns þann daginn.

Nú er hins vegar búið að fjarlægja hræið af dýrinu þannig að gönguferð í fjöruna við golfvöllinn að Kirkjubóli er þá bara til heilsubótar en ekki til að sjá útblásinn hnúfubak.

Á golfvellinum að Kirkjubóli á laugardaginn. Stöðugur straumur fólks var á golfvellinum alla helgina til að skoða hvalhræið í fjörunni. 

Á Garðskaga síðdegis á sunnudag. Hér hefur aðeins dregið úr bílafjöldanum en það var lagt þétt um allan Garðskaga. VF-myndir: Hilmar Bragi