Vöxtur sýslumannsembættisins á Keflavíkurflugvelli – styrkur Suðurnesjamanna

Svar við grein Ólafs Thordersen fulltrúa A-listans í Reykjanesbæ um rekstur sýslumannsembættisins á Keflavíkurflugvelli.

Það hefur vart farið fram hjá nokkrum manni hversu gífurleg aukning hefur orðið á öllum sviðum á Keflavíkurflugvelli sem tengjast aukinni farþegaumferð og fraktflugi. Vaxtarverkir hafa verið hjá öllum stofnunum og fyrirtækjum á svæðinu  síðustu ár og er sýslumannsembættið þar engin undantekning. Aukning verkefna embættisins á þessum fimm árum hefur verið umfram allar áætlanir. Þannig hefur flugfarþegum fjölgað frá árinu 2001 úr rúmum 1.3 milljónum í um  2 milljónir á yfirstandandi ári. Skráð verkefni lögreglu hafa fjórfaldast, skráð verkefni almennrar tollgæslu fimmfaldast og tollafgreiðslur embættisins á flugfrakt tífaldast. Auk þess hefur fíkniefnadeild tollgæslunnar verið stórefld með ánægjulegum árangri sem alþjóð er kunnugt um.
Á þessu sama tímabili hafa kröfur á sviði flugverndar einnig aukist verulega. Atburðir síðustu daga eru einmitt glöggt dæmi um hversu aukin verkefni geta borið brátt að. 
Þessari umbyltingu undanfarinna ára hefur óhjákvæmilega fylgt kostnaðarauki.  Föstum starfsmönnum embættisins hefur á þessu fimm ára tímabili t.a.m. fjölgað úr 79 í 156. Auk þess eru í sumar rúmlega 80 afleysingamenn að störfum til að leysa af starfsmenn í leyfum og til að tryggja að ekki verði tafir hjá farþegum á mesta annatíma ársins í flugstöðinni.

Það hefur ekki tekist að fullu að halda rekstri embættisins innan fjárheimilda á þessu átakatímabili. Á því ber ég sem forstöðumaður fulla ábyrgð. Halli hefur verið síðustu ár,  lengst af innan við 1% af rekstri en síðasta ár heldur meiri.  Samtals nemur þessi uppsafnaði halli innan við 2% af heildarrekstri síðustu fimm ára. Utanríkisráðuneytið, fjármálaráðuneytið og Ríkisendurskoðun hafa farið nákvæmlega ofan í saumana á rekstrinum og niðurstaða allra eftir því sem ég best veit er að þörf sé á auknum fjárveitingum til að mæta síauknum verkefnum. Ríkisendurskoðandi staðfesti þetta í blaðaviðtölum nýlega.
 
Fulltrúi A-listans í Reykjanesbæ hefur kosið að beina athygli að fjárhagsstöðu embættisins með greinaskrifum í Víkurfréttum og Morgunblaðinu og setur hana í  samhengi við komandi sameiningu löggæsluliða á Suðurnesjum um næstu áramót. Hann spyr hvort hún leiði til skertrar löggæslu á Suðurnesjum. Ljóst er að sú uppbygging sem átt hefur sér stað í löggæsluverkefnum á Keflavíkurflugvelli síðustu ár mun halda áfram. Þeir þrír utanríkisráðherrar sem ég hef starfað fyrir hafa allir staðið þétt við bakið á embættinu og skapað því grundvöll til að eflast og styrkjast svo um munar. Ég fullyrði að núverandi utanríkisráðherra sé sama sinnis. Á borði ráðuneytisins er verið að fara yfir fjármálin þessa dagana og verið að undirbúa tillögur um hvernig búið verði betur að embættinu m.a. í ljósi brotthvarfs Varnarliðsins.  Lausnir eru því í sjónmáli en endanlega er það ríkisstjórnar að taka slíkar ákvarðanir og lokaorðið síðan hjá Alþingi.

Þessa dagana er verið að undirbúa tilfærslu á stærstum hluta verkefna embættisins frá utanríkisráðuneytinu til dómsmálaráðuneytis og jafnframt sameiningu lögregluliðanna. Mjög metnaðarfull áform eru í undirbúningi um að efla löggæslu á Suðurnesjum í tengslum við þau sóknarfæri sem skapast við sameiningu lögregluliðanna. Það verður tilhlökkunarefni að fá að kynna þau áform á haustmánuðum fyrir sveitarstjórnarmönnum á Suðurnesjum.

Jóhann R. Benediktsson
Höfundur er sýslumaður á Keflavíkurflugvelli