Við getum það ef við viljum

Það varð uppi fótur og fit á Keflavíkurbryggju í gær þegar fréttamenn sjónvarpsstöðvarinnar Augnsýnar hlupu apríl í júní. Samkvæmt heimildum Svart & Sykurlaust fékk fréttadeildin ábendingu um að hinn heimsþekkti kvikmyndaleikari Sean Connery væri um borð í lúxusfleyi sem bundið er við bryggju í Keflavík. Rauk fréttadeildin á áhafnarmeðlimi bátsins og í offorsi var spurt hvort Sean Connery væri um borð. Áhafnarmeðlimurinn varð nokkuð hissa á þessari uppákomu en áttaði sig fljótlega á að um grín væri að ræða og svaraði: „Nei, en Harrison Ford er hér um borð,“ og síðan skellihló áhöfnin.
Ekki fer neinum sögum af því hvernig fréttamenn Augnsýnar tóku þessu síðbúna aprílgabbi, en heimildarmaður Svart & Sykurlaust sem þekkir til fréttadeildar stöðvarinnar segir að þegar ábending komi næst um frægan einstakling á Suðurnesjum, þá verði farið hægar í sakirnar.
Fréttamenn stöðvarinnar sáust taka viðtal við áhafnarmeðlim bátsins en ekki er vitað hvort meðlimurinn hafi verið spurður hvort hann hafi einhvern tíma hitt Sean Connery.