Ungmennanámskeið SamSuð

Samtök félagsmiðstöðva á Suðurnesjum (SamSuð) heldur árlegt námskeið fyrir nemenda- og ungmennaráð félagsmiðstöðva og grunnskóla á Suðurnesjum föstudaginn 21. nóvember 2003.  Námskeiðið fer fram í Samkomuhúsinu í Garðinum og hefst kl. 8:30 og stendur til kl. 15:00.  Öllum grunnskólum og félagsmiðstöðvum á Suðurnejsum stendur til boða að senda sín ráð á námskeiðið.

Meðal þess sem farið verður yfir á námskeiðinu er framkoma, ræðumennska, leikræn tjáning, ungmennalýðræði og hlutverk nemendaráða.  Tilgangur þessa námskeiðs er að styrkja unglingana sem sæti eiga í ráðunum þannig að þau verði betur í stakk búin til að takast á við verkefni komandi vetrar.   Þess má geta að Æskulýðsráð Hafnarfjarðar og Íþrótta- og tómstundaráð Reykjavíkur hafa staðið fyrir svipuðum námskeiðum fyrir unglinga á sínum svæðum.  Forsvarsmenn SamSuð eru vongóðir um að þátttaka á ungmennanámskeiðinu verði góð og að sem flestir sjái sér fært að nýta þetta tilboð.