Taktu afstöðu með hagræðingu!

Þann 8. október nk. munu íbúar Sandgerðis, Garðs og Reykjanesbæjar ganga að kjörborðinu og kjósa um sameiningu sveitarfélaganna. Sitt sýnist hverjum en nú gefst íbúunum loksins tækifæri til að láta skoðun sína í ljós á sameiningu sveitarfélaganna þriggja. Því er gott að staldra aðeins við, horfa til framtíðar og meta sameininguna með tilliti til þess hvað er best fyrir íbúa svæðisins.
Hið opinbera markmið með sameiningu sveitarfélaga er að efla sveitarstjórnarstigið svo hægt sé að færa aukin verkefni frá ríkinu til sveitarfélaganna. Sú tilfærsla auk aukinnar kröfu íbúa um vaxandi þjónustustig hefur auðvitað í för með sér aukin útgjöld sem í kjölfarið þrýstir á auknar tekjur sveitarfélaganna. Því hefur skapast aukin þörf á hagræðingu í sveitastjórnakerfinu. Ein leið í þessari hagræðingu er sameining sveitarfélaga víðs vegar um landið. En sameining getur skilað heildstæðara vinnu- og þjónustusvæði til handa íbúunum.
Ég tel sameiningu sveitarfélaganna hagsmunamál okkar allra því þannig myndum við eitt stórt öflugt sveitarfélag sem getur boðið íbúunum upp á fjölbreytta og góða þjónustu. Í þessu samhengi eiga vel við hin merku orð: ,,Sameinaðir stöndum vér en sundraðir föllum vér".
Því vil ég hvetja íbúa Reykjanesbæjar, Garðs og Sandgerðis að láta sitt ekki eftir liggja og kjósa næstkomandi laugardag um framtíð sveitarfélaganna. Nú er lag að skoða kosti og galla sameiningar, gera upp hug sinn og skila atkvæðinu í kjörkassann þann 8. október. Sameining verður ekki nema meirihluti kjósenda í viðkomandi sveitarfélagi lýsi samþykki sínu á sameiningartillögunni.
Þín skoðun skiptir máli.

Bestu kveðjur,
Jóhanna Guðmundsdóttir
Formaður Bæjarmálafélags Frjálslynda flokksins í Rnb.