Sýnum tillitssemi – ökum af háttvísi

Tilgangur umferðarlaga er m.a að stuðla að greiðri, öruggri og slysalausri umferð. Þar eru settar þær leikreglur sem okkur er ætlað að virða og fara eftir. Við getum séð fyrir okkur knattspyrnuleik þar sem engar reglur væru. Þar er dómarinn til að gæta þess að allt fari að settum reglum og hverjum dettur í hug að byrja leikinn ef dómarann vantar. Í umferðinni er lögreglan í þessu dómarahlutverki og hefur þar af leiðandi gífurlega þýðingu fyrir umferðaröryggi.

Að aka hægar (millifyrirsögn)

Það veitir ökumönnum aðhald og öryggi að geta gengið að því sem vísu að lögreglan sé úti á vegum við eftirlit og aðstoð. Það er nauðsynlegt að geta gripið inn í ef vart verður óeðlilegrar eð ólöglegrar hegðunar í umferðinni. Lögreglan hefur verið ötul að kæra þá sem aka of hratt og er það vel. Hins vegar vantar meira aðhald að þeim sem aka langt undir eðlilegum umferðarhraða og skapa með því óþarfa slysahættu með framúrakstri og pirringi annarra ökumanna. Í 5. grein umferðarlaga, greininni sem oft er kölluð varúðarreglan segir skýrt og klárt að ekki skuli tefja eða trufla umferð að óþörfu og sýna skuli öðrum vegfarendum tillitssemi. Þessa grein skil ég svo að ef einhverjir ökumenn þurfa að aka hægar en telja má eðlilegan umferðarhraða skuli þeir liðka til fyrir þeim sem á eftir koma og þurfa að fara framúr. Þetta má sem best gera með því að víkja vel til hægri og jafnvel nota útskot og afleggjara til þess að stöðva á.
Ökumönnum stórra bifreiða og bifreiða með eftirvagn er skylt að aka hægar eða ekki hraðar en á 80 km/klst. Þetta er að sjálfsögðu gert með umferðaröryggi að leiðarljósi en jafnframt verða ökumenn þessara bifreiða að sýna þeim sem á eftir koma fyllstu tillitssemi, víkja þar sem þess er kostur, nota stefnumerki og hægja hæfilega mikið á og hleypa framúr.

Þrjár mikilvægar sekúndur (millifyrirsögn)

Eitt er það sem veldur fjölda slysa en það er of stutt bil milli bifreiða. Til eru margar aðferðir við að meta rétta fjarlægð í næsta bíl fyrir framan en ein sú besta er svokölluð “þriggja sekúndna reglan”. Hún felst í því að við horfum á þegar bíllinn fyrir framan fer framhjá einhverju kennileiti, s.s. vegstiku, umferðarmerki eða þ.h. byrjum við að telja sem svarar til þrem sekúndum, 1001, 1002, 1003. Ef við erum ekki komin að nefndu kennileiti áður en þessari taldningu lýkur ætti bilið milli bílanna að vera nægilegt, reyndar miðað við bestu aðstæður. Önnur regla segir: Hafðu bilið að næsta bíl í metrum talið sömu tölu og hraðamælirinn sýnir, þ.e. 60 metra á 60 km hraða, 90 metra á 90 km hraða o.s.frv.

Kæru ökumenn munum að við erum ekki ein á ferð á vegunum. Fylgjum reglum, sýnum tillitssemi og munum að sýna hvort öðru þá háttvísi og tillitssemi sem við væntum frá öðrum.

Stuðlum að slysalausri umferð

Jón Gröndal