Suðurnes framtíðarinnar

Í mínum huga er það ljóst. Að hér verði blómleg byggð, fjölbreytni í atvinnulífi, öflugt mennta- og menningarlíf og að fjölskyldurnar verði hornsteinn samfélagsins.  Betra veður sakaði svo heldur ekki, frekar en annars staðar á landinu.

Mikið hefur verið byggt af íbúðarhúsnæði í Reykjanesbæ að undanförnu og enn er mikið í bygginu.  Almenn atvinnuuppbygging hefur ekki haldist í hendur við þá þróun og áhersla lögð á stórar hugmyndir sem enn hafa ekki skilað árangri.  Stálpípuverksmiðja í Helguvík varð ekki að veruleika og álver á sama stað er ekki í höfn.  Ég tel að leggja þurfi áherslu á fjölbreyttari tækifæri. Fólksfjölgun í Reykjanesbæ er minni en á jaðarsvæðum höfuðborgarsvæðisins en þegar litið er á Suðurnes í heild sinni er hún sambærileg við Grímsnesið og Garðabæinn. Á komandi misserum verður þó væntanlega breyting á. Það er staðreynd að fjölgun starfa í tengslum við aukin umsvif flugvallarins verður umtalsverð á komandi árum. Talað hefur verið um allt að 100 ný störf á ári.  Ferðamenn sem óku í gegnum byggðina voru tæplega 400.000 á síðasta ári og mun tvöfaldast á næstu 8 árum skv. 
spám skipulagssérfræðinga. Þá auðlind má nýta mun betur því stór hluti ferðamanna ekur í gegnum byggðina án þess að staldra við. Þá horfa menn einnig til metnaðarfullrar uppbyggingar á varnarsvæðinu og fjölgunar starfa í tengslum við hana.  Innan tíðar verður völlurinn iðandi af lífi og þó ekki liggi fyrir ákvörðun um það hvaða starfsemi verður rekin þar er ljóst á þessari stundu að mikill áhugi er meðal margra, á því að koma sér þar fyrir með starfsemi sem styður við samfélagið í heild sinni. Þannig veltir maður fyrir sér hvaða áhrif það hefur á verslun og þjónustu í bænum, ef 1000 íbúðir á Keflavíkurflugvelli fyllast af fólki? Slík fólksfjölgun styður svo sannarlega við uppbyggingu atvinnutækifæra.

Tækifærin er hins vegar ekki síst að finna í mannauðnum. Hér býr stór hópur vel menntaðs fólks sem jafnframt er duglegt og áræðið. Hvatning og stuðningur er oft það eina sem þarf til að hrinda frábærum hugmyndum í framkvæmd. Einstaklingsframtakið vegur ekki síður þungt við uppbyggingu atvinnutækifæra en sú uppbygging sem á sér stað á vegum sveitarfélaga. Aðalheiður í Kaffitári og Sigurður Hólm í Undra eru góð dæmi um það. Undanfarin ár hefur þó lítil áhersla verið lögð á uppbyggingu lítilla fyrirtækja og fáar stuðningsaðgerðir í boði fyrir metnaðarfullt fólk með góðar hugmyndir.

Miðstöð símenntunar hefur lagt sitt af mörkum s.l. 10 ár við að bjóða spennandi námstækifæri.  Í mars verður þar boðið upp á námskeið sem ber heitið "Ertu frumkvöðull?" og er ætlað fólki sem býr yfir góðri viðskiptahugmynd til að vinna með. Ég hef sjálf haft umsjón með sambærilegum námskeiðum hjá Impru, nýsköpunarmiðstöð og er sannfærð um að hér syðra á fólk margar góðar viðskiptahugmyndir ofan í skúffu sem bíða þess að fá að verða að veruleika. Námskeiðið er í boði atvinnuþróunarráðs SSS og ber að fagna því framtaki.  Margt smátt gerir eitt stórt segir einhvers staðar og vil ég hvetja bæði konur og karla sem komið hafa auga á tækifæri í túnfætinum heima, til þess að skrá sig á námskeiðið og taka þátt í atvinnuuppbyggingu á Suðurnesjum. Þar er ekki eftir neinu að bíða.

Veðrið verður þó að bíða betri tíma.

Helga Sigrún Harðardóttir
skipar 3. sæti á lista Framsóknar í Suðurkjördæmi