Miðvikudagur 9. febrúar 2000 kl. 16:20
Saga Keflavíkur 1920 til 1949 - Tillögur um leiðréttingar
Skömmu eftir að fyrstu athugasemdir mínar við Sögu Keflavíkur birtust í VF sendi sögunefndin frá sér blað, A4 með leiðréttingum á textum við 8 af myndunum í bókinni, þær hafa verið látnar fylgja henni síðan. Notkunarreglur fylgja blaðinu, í þeim segir „leiðréttingar eru birtar hér í sama formi og myndatextarnir á síðunum. Þeir sem það kjósa geta límt texta á viðeigandi staði”. Nefndin virðist ekki gara ráð fyrir að allir kæri sig um að hafa rétta texta við myndirnar, enda hefur hún ekki látið verða af frekari útgáfu á „límmiðum”. Ég held að flestir kjósi að hafa réttan texta við myndirnar, úr því að verið er að hafa texta við þær. Það þarf að leiðrétta fleiri texta en við þessa 8. Yfirleitt vill fólka hafa það sem rétt er í hverju máli. Ég ætla því að leyfa mér að gera tillögu um nokkrar lagfæringar, sem nefndin gæti notað við frekari útgáfu á límmiðum: Bls. 120 þar er mynd af starfsfólki í Hraðfrystihúsinu Jökli. Jón Kr. er rangt feðraður, hann var Magnússon. Bls. 130 mynd sögð af sundkeppni í Grófinni á 4. áratugnum. Þessa mynd lætur nefndarformaðurinn fylgja kynningarræðu sinni frá 17. sept. sem birtist í jólablaði Faxa, með sama texta. Myndin er af stakkasundi á sjómannadaginn, inni í höfn á 6. áratugnum. Bls. 167 mynd af báti, sögð af m/b Dux. Hún er af m/b Hilmi GK 489 . Eigandi var Sigurbjörn Eyjólfsson. Bls. 191 mynd , sagt beinum sturtað inn til vinnslu. Þarna er verið að sturta þurrum beinum inn í geymslu, þau voru möluð á haustin í húsinu til vinstri á myndinni. Bls. 206 auglýsing frá Dráttarbrautinni. Hér væri við hæfi að geta þess að þarna er í byggingu fyrsti vélbáturinn sem byggður var á Suðurnesjum, M/b Sæfari II 24 tonn. Eigendur Ólafur Bjarnason og Elías Þorsteinsson. Bls. 287 Mynd af „stríðsfyrirsögn” úr Alþýðublaðinu frá 1936. „Tveggja tíma slagsmál í Keflavík milli lögregluþjóns og drukkinna manna”. Til þess að bæta fyrir viðskilnað við þetta mál í frásögninni í bókinni , mætti koma hér: Réttað var út af þessum „slagsmálum” næstu tvo daga. 16 menn komu fyrir réttinn og báru vitni. Að því loknu var öllum sleppt og enginn var ákærður, hvað þá dæmdur. Hins vegar dæmdi almenningur í Keflavík Lárus Salomónsson og hann hvarf frá Keflavík strax um sumarið. Bls. 322. Mynd af söngflokki. Þar eru bræðurnir Gunnar og Ingólfur sagðir Jónssynir. Þeir eru og voru Jóhannssynir. Bls. 407. Texti við mynd:„keflvísk skólabörn.” Myndin er af öllum fermingarbörnum á Suðurnesjum vorið 1938, þegar þau voru á Laugarvatni með séra Eiríki Brynjólfssyni að læra sund. Nægjanlegt pláss er á spássíunum til þess að bæta um fleira en myndatextana með límmiðunum, nokkur dæmi um það: Bls. 109 - 122 er fjallað að mestu um VSFK. Láðst hefur að geta þess að árið 1935 tók Ragnar Guðleifsson við formennsku í félaginu og gegndi út tímabilið sem bókin fjallar um og lengur. Bls. 111 er sagt frá fyrstu stjórn kvennadeildar VSFK. Fyrst er talin Siruðína Jóhannsdóttir, hún var Jóramsdóttir. Bls. 137 bygging hafskipabryggjunnar, yfirsmiður sagður Þorgeir Klemensson. Hann hét Þorbjörn. Bls. 156. „Helstu vélbátaútgerðarmenn á 4. áratugnum”. Hér vantar að lágmarki : Jóhann Guðnason á Vatnsnesi, Jón og Eyjólf Eyjólfssyni, kennda við Garðshorn, Loft Loftsson, Ólaf Guðmundsson og síðast en ekki síst Ólaf S. Lárusson. Bls. 204. Sagt að Sigurbergur Ásbjörnsson hafi „sett leist sinn í fyrstu ,niður í kjallaranum hjá Þorgrími lækni að Kirkjuvegi 22a”. Úr því að sagt er frá hvar Sigurbergur hóf störf, þá ætti að hafa það rétt. Hann var fyrst í kjallaranum að Vallargötu 24 hjá Þorgerði Einarsdóttur. Bls. 209 - 215 er fjallað um kaupmenn í Keflavík. Þar vantar Danival Danivalsson. Danival seldi það sem kallaðar voru nýlenduvörur, skriffæri og fleira smálegt fyrir skólabörn að ógleymdu bensíni. Bls. 260, upptalning á hreppsnefndarmönnum í Keflavík 1920 til 1950. Heimild sögð fundargerð hreppsins. Hér fer meira en lítið á milli mála hvað varðar kosningarnar 1942 fyrir það fyrsta. Danival Danivalsson er sagður kosinn af lista Framsóknarflokksins. Danival var kosinn af lista VSFK og frjálslyndra manna, svo mun líka hafa verið 1938. Framsókn bauð ekki fram í Keflavík fyrr en 1946. Það merkasta við þessar kosningar var að fram kom nýr listi frá „óháðum mönnum”. Sigurþór Guðfinnsson hlaut kosningu af honum. Sigurþór studdi Sjálfstæðismenn í kosningu oddvita, en fulltrúa VSFK í að hefjast handa um vatnsveitu og holræsagerð, enda mun sleifarlag í þeim málum hafa verið ein aðalástæðan fyrir sérframboði þeirra. Hér læt ég staðar numið. Þeir sem keypt hafa bókina og „kjósa” að hafa það sem sannara reynist, gætu klippt þessar leiðréttingar úr blaðinu og geymt , þar til sögunefndin mannar sig upp í frekari„ límmiðaútgáfu”. Ólafur Björnsson.
