Nýtt fjölskyldu- og forvarnastarf í Byrginu

Stærsta þjóðfélags- og heilsufarsvandamál okkar Íslandinga í dag er án efa vímuefnaneysla og afleiðingar hennar; hér er um að ræða mikla harmleiki sem eiga sér stað á hverjum einasta degi. Á þessu og síðasta ári, þá hefur neysla ólöglegra sem og löglegra vímuefna aukist allverulega.Afleiðingar þessarar neyslu láta ekki á sér standa, en þær eru aukin glæpatíðni neytendanna til þess að geta fjármagnað neyslu sína, og ofbeldi og líkamsmeiðingar tengdar fíkniefnaskuldum. Heimili eru iðulega lögð í rúst hjá neytendum og foreldrum þeirra og mörg dæmi eru um það, að lítil börn horfi upp á hrikalegar ofbeldisaðgerðir svokallaðra handrukkara á heimilunum. Flest þessara mála komast aldrei í opinbera umræðu. Fórnarlömbin þora ekki að tjá sig af ótta við þá sem stjórna sölu og dreifingu á fíkniefnum. Það eru ekki fíklarnir sjálfir sem eiga eitrið, heldur er það fólk úr mismunandi stéttum þjóðfélagsins, bæði þekkt og óþekkt.
Saklausir borgarar eru myrtir af sjúkum fíkniefnaneytendum sem eru í örvæntingarfullri leit að næsta skammti til þess að viðhalda vímunni. Afbrotamönnum er stöðugt sleppt lausum beint á götuna eftir fangelsisvist, þar sem þeir svo halda áfram að fremja afbrot, t.d. fjársvik og innbrot til þess að fjármagna neyslu sína.
Afleiðingar þessa hörmungarástands eru: sundruð heimili, upplausn fjölskyldu, skilnaðir, kynlífsofbeldi, ótímabær dauðsföll af völdum neyslu, geðræn vandamál og mikil aukning sjálfsvíga.

Í ljósi þessa ástands og vegna þess að skjótra aðgerða er þörf, þá hefur Byrgið ákveðið að hrinda af stað umfangsmiklu átaki, sem snýr ekki einungis að vímuefnaneytendunum sjálfum, heldur að fjölskyldum þeirra. Nú í maímánuði hefst í Byrginu margþætt forvarnar- og fjölskyldustarf. Hlutverk þessa nýja starfs er að efla forvarnir og bjóða aðstandendum fíkla upp á fjölþætta og viðtæka þjónustu. Við munum veita fjölskyldum um land allt, fræðslu, ráðgjöf og stuðning, og einstökum nákomnum aðstandendum fíklanna, t.d. mökum, mæðrum og feðrum, sérstaka meðferð í Rockville. Meðferðin skiptist annars vegar í: fjölskyldu- og forvarnarstarf, þ.e. fræðslu og stuðning við fjölskyldur og forvarnarherferð í skólum og félagsmiðstöðvum landsins, og hins vegar er um að ræða sérstaka meðferð aðstandenda sem fram fer í Byrginu Rockville.

Fjölskyldu- og forvarnarstarfið samanstendur af eftirtöldum þáttum:

1) Fræðslu og kynningarfundum sem haldnir verða 1 sinni í viku í Byrginu, Rockville. Á fundunum verður starfsemi Byrgisins kynnt rækilega og skjólstæðingar í góðum bata gefur vitnisburð og deilir reynslu. Fyrsti fundurinn verður haldinn í byrjun júní 2002.

2) Kynningarbæklingum um meðferð aðstandenda og starfsemi Byrgisins verður í maí og júnímánuði n.k. dreift inn á hvert heimili í landinu.

3) Heimilisvitjanir: Í sérstökum tilfellum er fjölskyldum boðið upp á að fá ráðgjafa frá Byrginu í vitjun á heimilið, t.d. þegar um verulega erfiðar aðstæður er að ræða af völdum fíkilsins.

4) Símalína. Til að byrja með verða upplýsingar og ráðgjöf veitt í síma 423-7990 kl. 10-12 og 13-16 virka daga. Sérstakir símar eru gefnir upp á símsvara þegar skiptiborð lokar. Aukin símaþjónusta verður auglýst síðar í maímánuði.

5) Forvarnarstarf í grunn- og framhaldsskólum landsins: Ráðgjafar frá Byrginu halda fyrirlestra og gefa vitnisburð. Foreldrafélögum verður boðið upp á sérstaka fundi og lagður verður grunnur að samvinnu Byrgisins við foreldra og skóla. Fræðslu og kynningarriti dreift. Hefst 1. september 2002.


Aðstandednameðferð.
Hægt verður að veita 10 aðstandendum meðferð samtímis og bjóða upp á allt að 3ja mánaða meðferð. Sérstakt aðstandendaprógramm verður að hluta samofið meðferðarprógrammi fíkilsins, t.d. margir fyrirlestrar og fundir. Aðstandendaprógrammið sjálft samanstendur af bænastundum, einstaklingsviðtölum, ráðgjöf og leiðsögn, fræðslufundum og fyrirlestrum. Allar almennar reglur í meðferð aðstandenda eru hinar sömu og í hinni eiginlegu meðferð fíklanna. Aðhaldsreglur eru þær sömu, t.d. reglur um útivist af svæðinu, o.s.frv.

Skráning í meðferð aðstandenda er þegar hafin. Allar upplýsingar og skráning í
síma 423-7990.


F.h. Byrgisins Rockville,

Steinunn Marinósdóttir
Guðmundur Jónsson