Guðrún Erlingsdóttir gefur kost á sér í prófkjör Samfylkingarinnar í Suðurkjördæmi

Ég hef ákveðið að gefa kost á mér í 3. til 4. sæti í prófkjöri Samfylkingarinnar í Suðurkjördæmi þann 4. nóvember n.k. 

Ég er 44 ára,  gift Gylfa Sigurðssyni og saman eigum við 3 börn.  Heimili okkar er í Vestmannaeyjum.

Ég hef  starfað sem  formaður  Verslunarmannafélags Vestmannaeyja frá árinu 1993 og er auk þess starfsmaður kjaramáladeildar VR. Ég sat í miðstjórn Alþýðusambands Íslands og sit nú  í stjórn  Landssambands íslenzkra  Verslunarmanna auk annara trúnaðarstarfa .  Ég gengdi starfi bæjarfulltrúa í Vestmannaeyjum frá 1998-2006.  Í bæjarstjórn gengdi ég m.a. starfi forseta, var formaður  bæjar- og fjölskyldurráðs, auk margvíslegra annara verkefna.  Þá sat ég í stjórn Samtaka sunnlenskra sveitarfélaga, auk þess að taka þátt í verkefnisstjórn um vaxtarsamning við Suðurland.  Þessi störf hafa fært mér haldgóða þekkingu á málefnum Suðurlands og  innviðum sveitarstjórnarmála í kjördæminu. 

Félagsmál í víðasta skilningi þess orðs hafa verið mitt helsta áhugamál allt frá unglingsárum. Ég tel að með störfum mínum fyrir  verkalýðshreyfinguna og á  vettvangi sveitarstjórnarmála hafi ég öðlast dýrmæta reynslu sem gæti komið að góðum notum í þingstörfum.

Ég tel rétt að aftur verði til ein þjóð á Íslandi óháð búsetu og efnahag. Fyrir því vil ég fá að berjast.  Þess vegna gef ég kost á mér í 3-4 sæti á lista Samfylkingarinnar í Suðurkjördæmi fyrir þingkosningarnar, sem fram fara næsta vor.

Vestmannaeyjum 24 september 2006

Guðrún Erlingsdóttir