FYRSTA SVEITARFÉLAGIÐ SEM ER MARKAÐSSETT FRÁ A TIL Ö

Vogar á Vatnsleysuströnd eru fyrsta sveitarfélagið á Íslandi sem markaðssetur sig fyrir verktaka og almenning en í síðustu viku hélt það kynningarfund þar sem þetta óvenjulega markaðsátak var kynnt fjölmiðlum, fasteignasölum, verktökum og fleirum. „Okkar markmið er að íbúafjöldi verði kominn í eitt þúsund eftir þrjú til fimm ár“, sagði Jóhanna Reynisdóttir, sveitarstjóri í samtali við Víkurfréttir en í Vogum búa í dag um 700 manns.Á kynningarfundinum voru lögð fram gögn um það sem Vogamenn telja góða söluvöru. Jóhanna sagði að fyrst og fremst yrði reynt að ná til fjölskyldufólks og öll mál tengd fjölskyldunni efld í bæjarfélaginu. Þar má fyrst nefna skólamálin. Engir biðlistar eru á leikskóla. Grunnskólinn er einsetinn og þar er tölvukennsla fyrir alla bekki. Frá og með næsta hausti verður gefinn kostur á heilsdagsskóla, þ.e. lengdri viðveru að kennsludegi loknum. Þá verður boðið upp á fjölbreytt og öflug tómstundastarf með tónlistarkennslu, danskennslu, leiklistarnámskeiðum, tölvunámskeðum, íþróttum, aðstoð við heimanám og fleira. Öll útivistar- og tómstundastarfsemi verður efld enn frekar auk þess sem verið er að semja um stækkun golfvallarins, komin er smábátahöfn, unnið er að endurbótum á hafnarsvæðinu og nægt rými er til að stækka hesthúsabyggðina. Jóhanna sagði að hreppurinn hafi ásamt bæjarbúum gert átak í umhverfismálum seinustu vikurnar þar sem rusl hefur verið fjarlægt og umhverfið fegrað með málun og snyrtingu. Hreppurinn hefur gert samning við Húsasmiðjuna um 15% afslátt af vörum ogefni til viðhalds húsa og lóða fyrir alla íbúa Voga. Götur og gangstéttir verða endurnýjaðar í sumar og göngustígar lagðir meðfram sjávarsíðunni, Vogatjörn og víðar. Þá hefur verið stofnað skógræktarfélag og er gert ráð fyrir stórauknum trjágróðri í og við bæinn. Vogar hafa og óskað eftir því að verða þátttakandi í verkefninu Staðardagskrá 21 sem er umhverfisverkefni. Sveitarstjóri benti á mikið og gott byggingarland sem nær allt frá Hafnarfirði að Reykjanesbæ. Nyrst í Vogunum eru nokkrar stórar sjávarlóðir sem eru um 5000 fermetrar að stærð og henta vel undir stærri einbýlishús auk þess sem nægt pláss er fyrir bátaskýli, hesthús eða önnur útihús á lóðinni. Þessar lóðir kosta aðeins um 2 milljónir króna. „Hér kemst fólk í sveitasælu en er með góða þjónustu í hreppnum. Í hreppnum eru m.a. matvöruverslun, bensínstöð, pósthús og hraðbanki, heilsugæslustöð, apótek, tannlæknir og hárgreiðslustofa. Auk þess er stutt til höfuðborgar og Reykjanesbæjar í aðra þjónustu, en nú verður okkar aðal áhersla á næstunni að heilla byggingaverktaka á svæðið og fá þá til að byggja. Fasteignasalar hafa sagt að veruleg eftirspurn sé eftir húsnæði, sérstaklega íbúðum og raðhúsum. Það þarf að byggja um 90 íbúir á næstu 2-3 árum“, sagði Jóhanna og benti á að gatnagerðargjöld í Vogum væru um 500% lægri en í Reykjavík. Aðspurð um sameiningu við önnur sveitarfélög sagði Jóhanna það mál ekki lengur á dagskrá, alla vega að sinni, í kjölfar skoðanakönnunar sem gerð var en þar vildu um 60% ekki skoða sameiningu nánar. Hún sagði hins vegar að í náinni framtíð þyrfti að skoða þau mál betur. Í lok kynningarfundarins kom sveitarstjóri með nýja veðurfrétt sem vakti athygli. Hún var unnin samkvæmt upplýsingunum veðurstofunnar og er svona: Það rignir minna og er lygnara í Vogum heldur en á höfuðborgarsvæðinu!