Flugmálastjórn ræðst á Suðurnes

Í umræðu um flutning innanlandsflug til Suðurnesja hefur ýmsum sjónarmiðum verið haldið á lofti svo sem vænta má í jafn viðkvæmu og mikilvægu máli.  Í hádegisfréttum RÚV föstudaginn 16. september s.l. brá hins vegar svo við að talsmaður Flugmálastjórnar blandaði sér inn í umræðuna með fáheyrðum hætti og reyndi að slá Keflavíkurvöll út af kortinu.  Þetta er athyglisvert fyrir margt.

Í bakið á samgönguráðherra.
Í fyrsta lagi kemur embættismaðurinn þarna beinlínis í bakið á fagráðherra flugmála en kvöldið áður hafði Sturla Böðvarsson lýst því yfir á fjölmennum fundi að ef innanlandsflugið færi frá Reykjavík væri eðlilegast að það lenti á Suðurnesjum.  Auðvitað má Heimir Már hafa sína privatskoðun á staðsetningu innanlandsflugs en í umræddum fréttatíma var hann kynntur sem talsmaður Flugmálastjórnar.  Sem sagt opinber stofnun sem heyrir undir æðsta yfirmann flugmála, samgönguráðherra, setur opinberlega ofan í við ráðherrann með einkennilegri röksemdafærslu.

Eldgos og ekki eldgos.
Í öðru lagi beitir Flugmálastjórn fyrir sig þeim rökum að vegna hættu á eldgosi á Reykjanesi sé Keflavíkurflugvöllur ekki inni í myndinni fyrir innanlandsflug.  Heyr og endemi.  Sannarlega búum við á eldfjallaeyju og höfum lagað okkur að þeirri staðreynd.  Yrði alvöru gos á Reykjanesi (sem reyndar hefur ekki orðið í 7-800 ár) er víst að gjóska þess legðist jafnt yfir réttláta sem rangláta –nefnilega Faxaflóasvæðið allt – þ.m.t. Reykjavíkurflugvöll.  Þá bendi ég talsmanni Flugmálastjórnar á ungt hraun á Álftanesi, við Hafnarfjörð og í Heiðmörk.  Með röksemdarfærslu Flugmálastjórnar ætti í raun að leggja niður allt flug á sv-horninu og beina allri flugumferð á basaltsvæðin á Vestfjörðum eða Austfjörðum. 

Skaðar markað.
Ég átel Flugmálastjórn fyrir að stunda "hræðsluáróður" með yfirlýsingum sínum á grundvelli eldgosahættu.  Vinnubrögð af þessum toga er vítaverð.  Benda má á að mikill uppgangur er á Suðurnesjum.  Fjölmargir hafa kosið að flytja þangað á síðustu árum – sveitarfélögin öll kappkosta að bjóða lóðir til húsbygginga.  Yfirlýsing Flugmálastjórnar getur skaðað þá uppbyggingu með því að gefa í skyn að þar sé yfirvofandi meiri hætta á eldgosi en annars staðar.  Stofnunin á að kalla til baka hina einkennilegu yfirlýsingu sína.

Dularfullar herþotur í Reykjavík.
Í ljósi þessara vinnubragða fyllist maður einnig tortryggni vegna hinna einkennilegu lendinga fjögurra Harrier þota á Reykjavíkurflugvelli.  Sami talsmaður Flugmálastjórnar segir í fjölmiðlum (sama dag og hann reynir að slá Keflavíkurflugvöll út af borðinu) að herþoturnar hafi lent í Reykjavík sem varaflugvelli vegna slæmra lendingarskilyrða í Keflavík.  Samtímis lenda allar farþegaþotur suðurfrá.  Harrier-vélarnar eiga að vera sérlega vel útbúnar og þola margt.  Ég dreg mjög í efa að lendingarskilyrði á Suðurnesjum hafi verið þennan dag þannig að fullkomnustu herþotur hafi þurft frá að hverfa meðan farþegavélar lentu sem ekkert væri.  Ég krefst þess að Flugmálastjórn geri opinberlega grein fyrir því hvernig og hver hafi tekið ákvörðun um hina einkennilegu lendingu umræddan dag

Fagleg vinnubrögð eiga að ráða.
Hlutverk Flugmálastjórnar er að gæta alls öryggis í flugi.  Hefur hún að mörgu leyti staðið sig vel í því.  Hlutverk hennar er ekki að blanda sér inn í pólitískar umræður og beita fyrir sig vafasömum rökum.  Stofnunin glatar við það trúverðugleika sínum og þá er illt í efni.  Flugmálastjórn ætti fremur að bjóða áhugasamtökum aðstoð við að fara faglega yfir rök með og á móti því hvar innanlandsflugi er best fyrir komið.

Hjálmar Árnason,
alþingismaður.