Ég treysti Ragnheiði Elínu

Ragnheiður Elín Árnadóttir, iðnaðar- og viðskiptaráðherra, er framsýnn og góður leiðtogi. Hún hefur í störfum sínum sem þingmaður og ráðherra unnið af heilindum að viðamiklum og mikilvægum málefnum og er ferðaþjónustan sá málaflokkur sem hefur verið hvað mest áberandi á undanförnum misserum.

Vöxtur ferðaþjónustunnar sem í dag er stærsta atvinnugrein þjóðarinnar hefur haft mikil og jákvæð áhrif í kjördæminu okkar. Eins og við þekkjum þá eru nokkrir af okkar vinsælustu áfangastöðum erlendra ferðamanna sem sækja Ísland heim staðsettir í okkar fallega kjördæmi auk Keflavíkurflugvallar. Ný og spennandi störf hafa orðið til og atvinnuleysi heyrir nú sögunni til.

Miklum vexti fylgja bæði áskoranir og tækifæri – ekki hvað síst fyrir atvinnugrein sem á marga snertifleti. Stofnun Stjórnstöðvar ferðamála er dæmi um verkefni sem Ragnheiður hefur komið að sem iðnaðar- og viðskiptaráðherra. En Stjórnstöðin er vettvangur þar sem fulltrúar hins opinbera og greinarinnar vinna saman.

Ragnheiður er öflugur stjórnmálamaður og góð fyrirmynd fyrir konur sem hafa hug á að hasla sér völl á vettvangi stjórnmálanna. Hún þekkir það að vera með storminn í fangið, býr yfir þrautseigju og gefst ekki upp þó að á móti blási. Hún hefur leitt lista Sjálfstæðisflokksins í Suðurkjördæmi í gegnum tvær kosningar og er kjördæmið eitt sterkasta vígi Sjálfstæðisflokksins á landsvísu.

Ég treysti Ragnheiði Elínu til að leiða áfram þingflokk Sjálfstæðisflokksins í Suðurkjördæmi og mun setja Ragnheiði í fyrsta sæti í prófkjörinu sem fer fram þann 10. september.



Magnea Guðmundsdóttir

bæjarfulltrúi Sjálfstæðisflokksins í Reykjanesbæ