Miðvikudagur 19. janúar 2000 kl. 18:38
ÁRLEG SKATTASKÝRSLUGERÐ OG FRÆGIR SKATTALISTAR
Kæru bæjarbúar. Gleðilegt nýtt ár. Nú líður senn að hinni árlegu skattaskýrslugerð. Því fannst mér rétt að rifja upp umræður um skattamál og útsvarsgreiðslur einstakra bæjarbúa, sem fram fór í fyrra þegar listi með upplýsingum um útsvarsgreiðslur nokkurra bæjarbúa gekk manna á milli í tölvupósti og ljósritum. Einhver hafði sótt þessar upplýsingar í álagningarskrána, þar sem hún lá frammi á bæjarskrifstofunum í ágúst, og reiknað út uppgefin laun manna út frá heildar útsvarsgreiðslum. Umræðan um hugsanleg undanskot og skattsvik blossaði upp og þótti sumum ómaklega að sér vegið. Á sama tíma bentu aðrir á að hér áður fyrr tíðkaðist að gefa þessar upplýsingar út og dreifa í hús auk þess sem tímaritið Frjáls verslun hefur um langt skeið gert úttekt á launum einstaklinga úr ýmsum greinum atvinnulífsins þegar álagningi liggur fyrir síðla sumars ár hvert. Mér skilst nú að hópur manna hér í Reykjanesbæ undirbúi nú útgáfu blaðs þegar álagningin liggur fyrir næsta sumar og ætlunin sé að birta nöfn og útsvarsgreiðslur valinna einstaklinga úr ýmsum atvinnugreinum, bæði launþega og atvinnurekenda. Það verður fróðleg lesning fyrir marga. Álagning útsvars skilar sveitarfélögunum lang stærstum hluta af þeirra tekjum og er því ekki einkamál hvers og eins. Hver sá bæjarbúi sem ber virðingu fyrir sjálfum sér, umhverfi sínum og samfélaginu í heild, hlýtur að vilja leggja sitt af mörkum til samneyslunnar svo bæjarfélagið geti áfram þróast, vaxið og dafnað og um leið veitt þá þjónustu sem krafist er. Menn eiga ákveðin réttindi en líka skyldur. Stöndum saman um að taka sanngjarnan þátt í þeirri miklu uppbyggingu sem á sér stað í sveitarfélaginu. Þannig mun okkur skila áfram veginn. Kveðja Kjartan Már Kjartansson, bæjarfulltrúi
