Á nýrri öld

Kristján Pálsson, alþingismaður Reykjaneskjördæmi er bjartsýnn á framtíðina og telur Suðurnesin vera eftirsóknarverð. Umferðaröryggi á Reykjanesbrautinni er honum einnig ofarlega í huga í upphafi nýrrar aldar en í eftirfarandi grein skýrir hann stöðu mála hvað varðar tvöföldun á svokölluðum „Þjóðvegi dauðans“.

Kæru Suðunesjamenn, gleðilegt nýtt ár og innilegar þakkir fyrir öll gömlu árin.
Við aldahvörf líta menn gjarnan um öxl og kanna hvernig til hafi tekist. Það er skemmst frá því að segja að á Íslandi hefur orðið bylting á öldinni. Við höfum unnið okkur úr örbyrgð til þeirrar efna að vera ein auðugasta þjóð heimsins. Þar hafa Suðurnesjamenn ekki verið neinir eftirbátar annarra landshluta nema síður sé. Suðurnesin eftirsóknarverð.
Ekki er það svo að erfiðleikar hafi ekki steðjað að okkar svæði eins og öðrum. Má þar nefna erfiðleikana í upphafi tíunda áratugarins þegar atvinnuleysi reið yfir Suðurnesin. Samstaðan lyfti okkur upp úr þeim erfiðleikum svo eftir var tekið. Mikil sókn fyrirtækja Suðurnesjamanna undanfarið hefur eflt bjartsýnina svo að Suðurnesin eru orðin eftirsóknarverð á ný. Má þar nefna framsýn áform Hitaveitu Suðurnesja hf, sameiningu þriggja stórra sjávarútvegsfyrirtækja í eitt, útvíkkun á starfsemi Vísis hf. í Grindavík, vel heppnaða breytingu á Bláa lóninu og stækkun Leifsstöðvar. Á öðrum sviðum þá sér fyrir endann á byggingu D-álmu við Sjúkrahúsið í Keflavík, byrjunarframlag er veitt á fjárlögum til stækkunar Fjölbrautarskólans, framlag til endurbyggingar Duus húsa og eflingar ferðaþjónustu á svæðinu.
Undanfarin ár hefur verið unnið ötullega að því að auka umferðaröryggi á Reykjanesbrautinni. Þar má sérstaklega nefna lýsinguna sem hefur leitt til þess að umferðaröryggið hefur batnað verulega. Frekari umbætur eru þó mjög nauðsynlegar með tvöföldum Reykjanesbrautar og hafa þingmenn unnið að því af heilindum ásamt sveitarstjórnarmönnum á Suðurnesjum.

Reykjanesbraut tvöfölduð
Árið 1999 samþykkti Alþingi sérstaka langtímaáætlun í vegagerð þar sem gert er ráð fyrir því að tvöfölda Reykjanesbrautina og ljúka verkinu árið 2010. Það var fyrsta raunverulega skrefið af hálfu Alþingis til að viðurkenna þessa framkvæmd opinberlega. Í samræmi við langtímaáætlun hefur verið úthlutað fjármagni á vegaáætlun 2000-2004 sem nægir til umhverfismats, hönnunar, útboðs og fyrsta verkáfanga. Í nefndaráliti samgöngunefndar sem fylgir vegaáætluninni er svo eftirfarandi klausa; „stefnt er að því að stórum hluta þess þ.e. tvöföldun milli Straumsvíkur og Keflavíkur verði lokið 2006“. Samgönguráðherra hefur lýst yfir vilja sínum til að skoða frekari flýtingu þó ekki sé neitt ákveðið hvað það gæti orðið mikið.

Vegaáætlun
Núgildandi vegaáætlun mun samkvæmt upplýsingum Vegagerðar ríkisins verða endurskoðuð nú á vorþingi 2001 vegna breytinga í tengslum við fjárlög ársins. Heildar endurskoðun vegaáætlunar verður svo væntanlega árið 2001-2002 og er áhugi til þess að sú áætlun nái yfir fimm ár frá 2002-2006. Mikilvægt er að tvöföldun Reykjanesbrautarinnar komist öll inn á núverandi eða næsta áætlunartímabil svo framkvæmdir geti hafist strax af krafti.
Umhverfismati getur lokið í sumar en hönnum helst nokkuð í hendur við umhverfismatið. Að mati Vegagerðar ríkisins gæti útboð farið fram árið 2002 og framkvæmdir hafist sama ár. Stærstu verktakar landsins telja mögulegt að ljúka verkinu öllu frá Hafnarfirði til Reykjanesbæjar árið 2003 ef hafist væri handa snemma árs 2002. Það er þó háð undirbúningi framkvæmdanna og hvaða heimildir Alþingi og ríkisstjórn gefa til flýtingar innan vegaáætlunar svo ljúka megi verkinu því sem næst í einum áfanga.

Kristján Pálsson, alþingismaður