30 þúsund íbúar á Suðurnesjum innan 6 ára !

Óhætt er að fullyrða að samfélagið á Suðurnesjum hafi tekið stakkaskiptum undanfarið. Herinn farinn, stórfelld uppbygging við alþjóðaflugið þar sem áælta má að að lágmarki skapist  allt að 100 ný störf á hverju ári. Tvöföldun Reykjanesbrautar hefur fært okkur enn nær áhrifasvæði höfuðborgarinnar og starfa nú rúmlega 20% Suðurnesjamanna á höfuðborgarsvæðinu.
Þá mun uppbygging væntanlegs álvers í Helguvík stuðla að enn frekari vexti svæðisins.

Góður starfsandi og vel samkeppnishæf laun
Áælta má að nýtt álver í Helguvík muni skapa 1000 ný störf beint og óbeint. Reynslan sýnir að álver eru almennt góðir vinnustaðir sem borga í flestum tilfellum hærri laun en flestar aðrar atvinnugreinar.

Þekkingar- og hátækniiðnaður
Ólíkt því sem halda mætti af umræðunni er álver og álframleiðsla hátækniiðnaður og í raun gott dæmi um hvernig rótgrónir atvinnuvegir geta nýtt sér það besta sem tölvu- og tæknisamfélagið býður upp á til að auka framleiðni og gæði framleiðslunnar.
Áliðnaður er þekkingariðnaður sem sést kannski best á því að hjá álverinu í Straumsvík starfa hátt í 100 manns sem hafa lokið háskólaprófi flestir í verk-og tæknifræðigreinum. Auk þess starfa á annað hundrað manns sem hafa lokið einhverskonar iðnaðarmenntun eins t.d. bifvélavirkjar, vélvirkjar, rafvirkjar, matreiðslumenn, rafeindavirkjar, málarar o.s.frv. Þá hafa hátt í 200 starfsmenn lokið prófi frá stóriðjuskóla sem veitir þeim tækifæri til frekari starfsþróunar.
Auk alls þessa er rétt að benda á það að fjöldi þjónustufyrirtækja selja þjónustu sína og tæknilausnir til álvera.

Úrvinnsluverksmiðja áls í Helguvík
Ál er að mestu notað í  framleiðslu samgöngutækja eins og bíla, járnbrautir, flugvélar o.s.frv. Þá er ál einnig notað í byggingariðnaði, lyfjaiðnaði og  matvælaiðnaði. Líklegt er að hægt verði að þróa úrvinnslu á áli í Helguvík og þannig stuðla að enn frekari vexti Suðurnesja. Þá verður að passa að skipuleggja og taka frá svæði strax í Helguvíkinni fyrir framtíðar uppbyggingu úrvinnsluverksmiðja úr áli.

Keflavíkurflugvöllur
Auk mikillar fjölgunar starfa vegna alþjóðaflugsins og Helguvíkur er líklegt að mörg ný atvinnutækifæri muni skapast við nýtingu fyrrum mannvirkja Varnarliðsins á Keflavíkurflugvelli. Samhliða þessarri miklu uppbyggingu verður hægt að taka í notkun í skömmtum íbúðabyggingar og önnur samfélagsleg mannvirki sem þarna eru til nýtingar fyrir samfélagið á Suðurnesjum. Alþjóðaháskólastarfsemi er starfsemi sem vel mætti hugsa sér að hefði not fyrir einhvern hluta þeirra samfélagsbygginga sem nú standa auðar á vellinum. Sjávarútvegs- og jarðhitaskóli Sameinuðu þjóðanna gætu hafið starfsemi strax á vellinum.

Af hverju er þessi mikli vöxtur eftirsóttur ?
Þessi mikla uppbygging og skynsöm nýting mannvirkja á Keflavíkurflugvelli mun auka tekjur og bæta efnahag sveitarfélaga á Suðurnesjum gríðarlega og styrkja þau þannig til að veita íbúunum bestu þjónustu sem völ er á. Þannig verður hægt að bæta þjónustuna við barnafólk og koma betur til móts við þarfir eldri borgara á Suðurnesjum. Efla starf skólanna okkar á öllum skólastigum, veita fötluðum einstaklingum betri þjónustu, efla menningarlífið, blása til nýrrar sóknar í forvörnum, efla félagsþjónustu sveitarfélagsins verulega,  styrkja rekstur og tryggja íþrótta- og tómstundahópum bestu aðstöðu sem völ er á. 
Suðurnesin munu því í framtíðinni verða eftirsóttasti búsetukostur á öllu landinu sem mun aftur hafa stórfelld áhrif á fasteignamarðkaðinn.

Suðurnesjamenn, stöndum því saman og gerum allt til að tryggja:

1. Skynsamlegt rekstrarfyrirkomulag alþjóðaflugvallarins.
2. Uppbyggingu álvers í Helguvík.
3. Skynsamlega ráðstöfun fyrrum eigna Varnarliðsins til atvinnuppbyggingar.

Samhliða stórfelldri atvinnuuppbyggingu, tryggjum við sterk sveitarfélög sem hafa burði til að veita íbúunum bestu þjónustu sem völ er á um allt land og þó víðar væri leitað. Ein af forsendum þess að svo geti orðið er að sveitarfélögin á Suðurnesjum sameinist, flokkadrættir milli sveitarfélaga getur virkað sem hindrun á áhuga atvinnulífsins á því að hefja starfsemi hér.

Eysteinn Jónsson
Bæjarfulltrúi Framsóknar fyrir A-listann í Reykjanesbæ