Omnis
Omnis

Pistlar

Sameinaðir Suðurnesjamenn
Laugardagur 22. febrúar 2020 kl. 07:45

Sameinaðir Suðurnesjamenn

„Oh, I am sorry. Am I too late for my flight? Flying to New York. I am so sorry. I went to the wrong airport“ !!!!!

Bandarísk kona í viðskiptaerindum. Henni er vorkunn. Hvernig á hún að þekkja muninn á Reykjavik Airport og Reykjavik-Keflavik International Airport. Steini á hótelinu má eiga það að hann nennti einn manna að röfla yfir þessu rugli á sínum tíma. Af hverju má flugvöllurinn ekki bara heita Keflavik Airport? Þú getur flogið á John F. Kenndy og La Guardia og veist að þú ert að lenda í stærstu borg vesturlanda, New York. Flugvöllurinn þarf ekki að heita New York Airport.

Hvernig átti þessi ágæta kona að fatta það fyrr en hún var komin í flugstöðina í Vatnsmýri að þaðan færi hún ekki neitt nema til Ísafjarðar, Akureyrar eða Grænlands.

Suðurnesjamenn hafa barist fyrir tvöföldun Reykjanesbrautarinnar frá aldamótum og áttu einu sinni bestu fæðingardeild landins á Sjúkrahúsinu í Keflavík. Nú þegar Þorbjörn sem átti að vera löngu dauður lætur á sér kræla vakna upp spurningar um raforkuöryggi á Suðurnesjum. Enn fleiri spurningar vakna þegar flugslys verður á Keflavíkurflugvelli. Í baksýnisspeglinum er ljóst að uppskera úr sameiginlegum sjóðum landsmanna á síðastliðnum áratugum er ansi rýr. Herinn farinn, steinsteypukumbaldi sem átti að vera álver, svikamylla Teslu-Magga og gjaldþrota hafnarmannvirki. Til að kóróna allt saman eru fjámunir sem fengust fyrir eignasölu á Ásbrú notaðir annars staðar.

Í síðasta tölublaði Víkurfrétta stökk fram á atkvæðaveiðar SkattaBensabaninn, formaður Viðreisnar. Það þarf pening í sjúkrahúsið, ljúka tvöföldun Reykjanesbrautar og halelújah. Þetta gat hún ekki gert þegar Viðreisn var í ríkisstjórn svo upptekin var hún af því að hálshöggva Bensa.

Nóg komið. Suðurnesjamenn þurfa að sameinast óháð flokkslínum. Okkar eigið kjördæmi. Sameinaðir Suðurnesjamenn – flokkur Suðurnesjamanna með einföld verkefni til næstu fjögurra ára: Reykjanesbraut – HSS – Suðurnesjalína 2 og vitanlega Keflavik Airport.

Margeir Vilhjálmsson