Handfærasjómenn nýta sér góða veðrið í nóvember

Þegar komið er svona langt inn í árið þá er ekki algengt að minnstu bátarnir séu mikið að róa en það hefur engu að síður verið þannig núna í nóvember. Veðurfarið hefur verið nokkuð gott og minnstu bátarnir sem að mestu eru þá á handfærum hafa nýtt sér það.
Töluvert margir bátar hafa farið á sjó núna í nóvember á færi, en þetta eru samtals fjórtán bátar og skiptast þeir þannig að fimm bátar hafa róið frá Grindavík á færi og aflahæsti færabáturinn þar er Agla ÍS með 5,1 tonn í sex róðrum og mest 1,9 tonn í einni löndun, næstur á eftir honum kemur Ólafur GK með 4,3 tonn í sjö róðrum.

Í Sandgerði hafa níu færabátar landað núna í nóvember og tveir bátar skara þar nokkuð úr hópnum en það eru Séra Árni GK og Hawkerinn GK. Þegar þessi pistill er skrifaður þá hefur Séra Árni GK landað tæpum 13 tonnum í sjö róðrum og er aflahæsti handfærabáturinn á landinu í nóvember, Hawkerinn GK hefur landað tæpum 10 tonnum í sjö róðrum og mest 3,2 tonn.

Þetta er ansi góður afli á færi í nóvember enda hafa þessir tveir bátar verið að mestu að eltast við ufsann. Þá má geta þess að í flestum róðrunum hjá Séra Árna GK hafa tveir menn verið um borð en í Hawkernum GK hefur aðeins einn maður verið alla róðranna í nóvember, og reyndar hefur Jóhann Haukur sem er skipstjóri og eigandi ásamt konu sinni verið einn á bátnum alla róðra þetta ár.
Annars förum aðeins út á land núna og lítum á línubátana sem eru fyrir austan og norðan, en veiðin hjá þeim hefur verið nokkuð góð núna í nóvember og það fer að líða að því að sumir bátanna fari að koma suður til veiða.

Flestir bátanna eru á Skagaströnd, og reyndar eru allir Stakkavíkurbátarnir þar nema nýi báturinn Guðbjörg GK. Á Skagaströnd er til dæmis Gulltoppur GK sem hefur landað 58 tonnum í tólf róðrum. Hemmi á Stað GK er þar og hefur landað 25 tonnum í fimm róðrum. Geirfugl GK er kominn með 30 tonn í sjö róðrum. Hópsnes GK 40 tonn í níu róðrum og Óli á Stað GK, sem hefur átt ansi gott haust, hefur landað 161 tonni í sextán róðrum og mest 24 tonnum í einni löndun.

Fyrir austan eru Einhamarsbátarnir. Gísli Súrsson GK er kominn með 95 tonn í átta róðrum og mest 25 tonn. Vésteinn GK með 80 tonn í sex og mest 15 tonn og Auður Vésteins SU er kominn með 177 tonn í fjórtán róðrum og mest 21 tonn. Allir þessir bátar hafa verið að landa á Stöðvarfirði og Neskaupstað.