Mannlíf

Sumarsýning í Bíósal Duus Safnahúsa
Duus Safnahús eru opin alla daga frá 12:00 til 17:00 og er ókeypis aðgangur í allt sumar.
Sunnudagur 18. júlí 2021 kl. 13:12

Sumarsýning í Bíósal Duus Safnahúsa

Duus Safnahús og Listasafn Reykjanesbæjar bjóða til samstarfs í sumar við fólk sem ástundar myndlist og býr á Suðurnesjum. Góð þátttaka var um sýningarpláss, átán einstaklingar sóttu um og af þeim voru fjórir valdir til þess að sýna á tveimur samsýningum í Bíósal Duus Safnahúsa. 

Seinni myndlistarsýningin opnaði í gær (17. júlí) og stendur til 22. ágúst 2021. Sýningin er samsýning Einars Lars Jónssonar (Larz) og Unnar Karlsdóttur.

Public deli
Public deli

Einar Lars Jónsson (Larz)

Einar Lars (f. 1978) hefur haft áhuga á listrænni ljósmyndun í fimmtán ár og sýnir ljósmyndir úr sýningunni Hugmynd|Perception. Á þessu ári hefur myndefnið einnig verið sýnt í Gallery Grásteini og eins verður það sýnt í Galleríi í miðbæ Stokkhólms í desember 2021.

Myndirnar eru sýn í efnisheiminn allt í kringum okkur. Þar sem litir, form og áferð eru í aðalhlutverki. Myndirnar eru kraftmiklar með vott af dulúð og eiga að hreyfa við ímyndunarafli sjáandans. Þær eru teknar víða þó mestmegnis á Suðurnesjum.

Einar Lars lauk B.A. í heimspeki frá Háskóla Íslands, hann var eitt ár í Feneyjum og nam þar við Ca´Foscari háskólann bæði ítölsku og heimspeki. Síðasta áratug hefur Einar Lars starfað sem knattspyrnuþjálfari og er með UEFA A og UEFA Elite þjálfaragráður.

Unnur Karlsdóttir 

Unnur er fædd og uppalin í Reykjavík. Hún hefur málað og teiknað frá barnsaldri. Unnur vinnur með vatnsliti, ink (blek) og grafík í verkum sínum. Hún hefur lokið fjölmörgum námskeiðum í grafík og málun, einnig hefur Unnur tekið þátt í Nýsköpunarsmiðju Hakkit árið 2016.

Unnur stundaði nám við Myndlista- og Handíðaskóla Íslands, grunnnám 1980–1981 og textíldeild 1985–1988. Hún lærði fatahönnun við Columbine skolen í Danmörku 1991–1993.

Unnur hefur starfað sem myndmennta- og handmenntakennari og sem leiðbeinandi á handavinnustofu aldraða. Frá árinu 2011 hefur hún starfrækt Ljósberann sem er skermagerð.