Bláa Lónið - 01apíl.
Bláa Lónið - 01apíl.

Mannlíf

Siggi söngvari kennir sjálfbærni og sköpun á Hallormsstað
Páll Ketilsson
Páll Ketilsson skrifar
laugardaginn 21. ágúst 2021 kl. 07:27

Siggi söngvari kennir sjálfbærni og sköpun á Hallormsstað

Hallormsstaðaskóla er verið að kenna nýtt nám í Sjálfbærni og sköpun. Námið er einstakt hér á landi og líklega þó víðar væri leitað og blandar saman fræðilegri- og verklegri nálgun á sjálfbærni með áherslu á sköpunargleði og nýsköpun. Fagstjóri námsins er Keflvíkingurinn Sigurður Eyberg Jóhannesson en hann var að ljúka doktorsnámi í umhverfisfræði.

Siggi hefur komið víða við og söng með þekktum hljómsveitum bítlabæjarins, er lærður leikari frá London en hefur síðustu árin haft hugann við umhverfismál og er orðinn doktor í fræðunum.

Public deli
Public deli

„Námið í Hallormsstaðaskóla er okkuð einstakt á íslenska vísu og leitast við að nálgast sjálfbærni með raunverulegum hætti. Nemendur geta valið sér leiðir í gegnum námið eftir áhugasviði og hvar þeir vilja helst beita sér, umhverfislega, samfélagslega eða efnahagslega. Þetta eru auðvitað þessir skilgreindu grunnþættir sjálfbærnihugtaksins og því eru nemendur í raun alltaf að vinna á öllum sviðum að einhverju leyti. Þetta er gríðarlega skemmtilegt verkefni og gaman að sjá nemendur vera að stofna fyrirtæki og alskonar eftir árið, jafnvel nemendur sem hefðu aldrei trúað að þeir ættu eftir að gera slíkt. Það er gefandi og gaman að fylgjast með svoleiðis, svo maður tali nú ekki um hvað það er samfélagslega jákvætt,“ segir Sigurður sem samkvæmt þessu er kominn í draumavinnuna þar sem sjálfbærni er stóri þátturinn.

Smellpassaði í starfið

Sigurður sá auglýst eftir fag-stjóra fyrir nýtt nám í Hallormsstaðaskóla, - sjálfbærni- og sköpun og smellpassaði auðvitað í starfið. Hann segir mikla frumkvöðlahugsun í gangi á Austurlandi þar sem fólk gerir matvöru og nytjahluti úr nærumhverfinu á sjálfbæran hátt. Byrjað var að kenna námið haustið 2019 en vegna Covid varð veturinn endasleppur svo segja má að aðeins sé búið að ljúka einum heilum vetri, þ.e. síðasta vetri.

„Helmingur námsins er verklegur á móti helmingi fræðilegrar nálgunar. Í verklega hlutanum læra nemendur ýmiskonar handverk og tækni til að nýta auðlindir náttúrunnar. Að sjálfsögðu er sjálfbærni leiðarljósið og því áherslan á að nýta náttúruna með sjálfbærum hætti. Námið er lotuskipt og hefur hver lota sitt þema þar sem kafað er ofaní ákveðna þætti mannlegs lífs – þá þætti sem mestu máli skipta fyrir sjálfbærni,“ segir hljómsveitarsöngvarinn að sunnan.

Námið að hausti hefst með lotu sem kallast Uppskera og náttúrulegt heilbrigði. Nemendur tína og safna auðlindum náttúrunnar og veiða fisk og hráefnin síðan notuð í lotum vetrarins í náminu. Næsta lota er um mat. Í verklega hlutanum læra nemendur ýmsar aðferðir til að verka og varðveita matvæli svo sem kjöt, mjólk, korn, grænmeti og ávexti. Ein lota er um nytjahluti sem gagnast okkur í daglegu lífi. Nemendur læra að búa til ýmsa gagnlega hluti úr afurðum náttúrunnar auk þess að rannsaka umhverfisáhrif þeirra hluta sem við notum hvað mest og teljum okkur þurfa. Eftir áramótin læra nemendur textíl, læra að vefa, vinna leður og feld og ótrúlegt en satt þá er fjármálalota sem tekur á peningum og rekstri. Þá er listsköpun tekin fyrir og orka sem Sigurður segir í námslýsingu að sé eitt mikilvægasta atriðið í allri sjálfbærniumræðu og þar er sérstaklega horft til sjálfbærra leiða til virkjunar. Áhersla er lögð á smærri einingar – einingar sem nemendur gætu átt eftir að velja sér sjálfir til heimilisrekstrar eða álíka. Nemendur læra hvernig menn bera sig að til að virkja vind, vatn og jarðvarma. Skoðuð verða umhverfisáhrif þessara orkukosta sem og annarra svo sem olíu. Nemendur fá einnig kennslu í ýmsu sem tengist húsnæði, m.a. handbragði við torf- og grjóthleðslu. Siggi segir að enn sé hægt að sækja um í námið en nemendur þurfa að hafa lokið stúdentsprófi eða sambærilegu námi.

Virkja sköpunarkraftinn

Í náminu er nemendur hvattir til að einbeita sér að lausnum frekar en vandamálum og nýta sér áhugasvið sín til að virkja sköpunarkrafta sína. Það er óhægt að segja að keflvíski rokksöngvarinn hafi virkjað á mörgum stöðum í gegnum tíðina og hann er ánægður á þessum merkilega Hallormsstað. Honum fannst hann vera komin til útlanda þegar hann lenti á flugvellinum á Egilsstöðum í fyrra. Veðurblíðan var slík. Líklega minni vind(orka) en í sönní KEF.

Það er mjög auðvelt að sjá að dagurinn er oft langur hjá okkar manni en er ekki samt alltaf stutt í músíkina Siggi?

„Ef það er eitthvað eftir af deginum þá reynir maður að gera einhverja tónlist en miðað við afköstin með plötu á tíu ára fresti, þá sést að það er sjaldnast mikið eftir af deginum.“

Bítlabæjardrengir reyndu við frægðina

Sigurður Eyberg er líklega meira þekktur sem söngvari hljómsveita úr bítlabænum. Margir muna eftir Deep Jimi and the Zep Creams og Pandóru. Siggi kom fram með félögum sínum í Pandóru í Geimsteini á Ljósanótt fyrir nokkrum árum og með Deep Jimi í heimabænum og í Reykjavík árið 2019.

Siggi og félagar hans í Deep Jimi reyndu við frægðina fyrir þrjátíu árum síðan en þá var hann nýbúinn að ljúka stúdentsprófi frá Fjölbrautaskóla Suðurnesja. Náðu meira að segja plötusamningi við dótturfélag Warner Brothers sem gaf út fyrstu breiðskífu sveitarinnar og síðan fimm laga plötu með tónleikaupptökum en Keflvíkingarnir fíluðu ekki að hefja ferilinn ytra sem upphitunarhljómsveit og fannst hlutirnir ekki gerast nógu hratt. Fóru því heim aftur.

Sigurður bjó í nokkur ár í London og lauk þar B.A. námi í leiklistarskólanum E-15 Acting School árið 1997. Hann lék á sviði í London í nokkur árum og stofnaði m.a. leikhópinn Brian sem „starfaði á jaðri leikhúslífs Lundúna,“ eins og segir í ferilslýsingu Sigurðuar á vefsíðu Hallormsstaðaskóla.

Sigurður hefur undanfarin ár starfað að málum og rannsóknum tengdum umhverfisfræðum hjá stofnunum eins og Umhverfisstofnun og Háskóla Íslands og þá var hann stjórnandi nýsköpunarverkefnisins Garðashólmur ses. Hann hefur ásamt bróður sínum Magnúsi einnig unnið að byggingu vindorkugarðs í Dalabyggð en þeir reka saman fyrirtækið Storm Orka ehf. Verkefnið er stutt af fyrirtækinu Siemens Games Renewable Energy en það er einn stærsti vindmylluframlandi heims. Þá vakti Sigurður athygli ekki fyrir löngu síðan þegar hann framleiddi heimildarmyndina „Maðurinn sem minnkaði vistsporið sitt“ en hún var sýnd á RÚV.