Reykjanesið okkar er algjör paradís
Karen Ásta Friðjónsdóttir segir að 2020 hafi kippt sér niður á jörðina. „Ég fann ekki hvað ég var orðin spennt og á yfirsnúning og bara alltaf á fullu fyrr en allt var sett á stopp,“ segir hún í samtali við Víkurfréttir.
– Nafn:
Karen Ásta Friðjónsdóttir.
– Fæðingardagur:
15. ágúst 1969.
– Fæðingarstaður:
Keflavík.
– Fjölskylda:
Gift Guðmundi Sigurðssyni, lögreglumanni, og eigum við fjögur börn, tvö tengdabörn og fjögur barnabörn.
– Hvað ætlaðir þú að verða þegar þú yrðir stór?
Úff! Góð spurning, mig minnir að dans, söngur og hestamennska hafi spila þar inn í.
– Aðaláhugamál:
Fótbolti og ferðalög eru mér mjög kær.
– Uppáhaldsvefsíða:
Skoða nú margt og mikið en ætli þessar síður pompi ekki mest upp fotbolti.net og yr.no
– Uppáhalds-app í símanum:
Ætli ég noti ekki þessi öpp mest Spotify og Spilarann.
– Uppáhaldshlaðvarp:
Hef nú ekki verið að hlusta mikið á hlaðvarp en HÆ HÆ er það fyrsta sm ég hugsa um.
– Uppáhaldsmatur:
Kjúklingabringur a la Gummi.
– Versti matur:
Hákarl og súrmatur, get bara ekki borðað það.
– Best á grillið:
Lambainnralæri í góðri mareneringu.
– Uppáhaldsdrykkur:
Vatnið hefur alveg átt mig síðustu árin en Pepsi er gott inn á milli.
– Hvað óttastu?
Aldrei pælt í óttanum. Ef ég myndi láta ótta ráða þá væri ég ekki sú persóna sem ég er í dag.
– Mottó í lífinu:
Lifðu lífinu lifandi. Þú veist aldrei hvað morgundagurinn bíður upp á.
– Hvaða mann eða konu úr mannkynssögunni myndir þú vilja hitta?
Nú er ég orðlaus man ekki eftir neinni manneskju sem ég myndi vilja hitta.
– Hvaða bók lastu síðast?
Agatha Christie, Spilin á borðið.
– Ertu að fylgjast með einhverjum þáttum í sjónvarpinu?
Er alveg dottin í The Block og Fort Salem.
– Uppáhaldssjónvarpsefni:
Hasarmyndir og gamanmyndir engar ástarþvælur.
– Fylgistu með fréttum?
Fréttir jú, jú. Karlinn er algjör fréttaveita og þarf helst að hlusta og horfa á allar fréttir, svo ég hlusta með öðru eyranu og horfi með öðru auganu.
– Hvað sástu síðast í bíó?
Hahaha! Leiðinlegustu mynd sem ég hef séð, Hellboy.
– Uppáhaldsíþróttamaður:
Verð að nefna þessa tvo; Sindra Þór Guðmundsson en hann spilar með meistaraflokki Keflavíkur og Sigurð Guðmundsson en hann spilar golf með Golfklúbbi Suðurnesja.
– Uppáhaldsíþróttafélag:
Ææ, smá bobbi en ég verð að nefna þau bæði Keflavík og Víðir Garði.
– Ertu hjátrúarfull?
Hjátrúarfull, já ekki spurning.
– Hvaða tónlist kemur þér í gott skap?
90’s tónlist eða eiginlega næstum allt.
– Hvað tónlist fær þig til að skipta um útvarpsstöð?
Þungarokk dauðans og leiðinlegur þáttastjórnandi.
– Hvað hefur þú að atvinnu?
Ég er heimavinnandi en hef í gegnum árin setið í hinum ýmsu stjórnum íþróttafélaga og er núna í stjórn Special Olympics á Íslandi.
– Hefur þú þurft að gera breytingar á starfi þínu vegna COVID-19?
Þurfti nú ekki að breyta neinu vegna vinnu en passa mig nú samt á öllu.
– Hvernig hefur þú verið að upplifa árið 2020 hingað til?
Það má með sanni segja að 2020 hafi kippt manni niður á jörðina. Ég fann ekki hvað ég var orðin spennt og á yfirsnúning og bara alltaf á fullu fyrr en allt var sett á stopp – en liðið mitt vill meina að ég sé ofvirk.
– Er bjartsýni fyrir sumrinu?
Ég er mjög bjartsýn á sumarið og mun njóta þess með fjölskyldunni eins og hægt verður.
– Hvað á að gera í sumar?
Sumarið verður áfram nýtt í að njóta og lifa. Eins verður eltingarleikur með fótboltann á eftir Keflavík og Víði.
– Hvert ferðu í sumarfrí?
Sumarfríið verðu tekið í haust (vonandi) og þá í smá sól og hita.
– Ef þú fengir gesti utan af landi sem hafa aldrei skoðað sig um á Suðurnesjum. Hvert myndir þú fara með þá fyrst og hvað myndir þú helst vilja sýna þeim?
Fyrst væri auðvitað að fara með þau út á skaga. Þar sem orkan, sandurinn og vitarnir okkar eru. Síðan væri það Brúin á milli heimsálfa, Gunnihver, Brimketill og Stafnesið. Reykjanesið okkar er algjör paradís bæði að keyra um og að fara í göngur.