Vinstri Grænir
Vinstri Grænir

Mannlíf

Öll orðin meistarar í að haga seglum eftir vindi
Sunnudagur 5. september 2021 kl. 09:20

Öll orðin meistarar í að haga seglum eftir vindi

Hilmar Egill, skólastjóri í Vogum, mælir með því að enda góða dagsferð á Papas í Grindavík.

Hilmar Egill Sveinbjörnsson, skólastjóri Stóru-Vogaskóla, segir tilfinninguna fyrir haustinu og komandi vetri vera góða. „Það eru mörg krefjandi verkefni framundan en ég held að við öll sem komum að skólastarfi séum orðin meistarar í að haga seglum eftir vindi hverju sinni. Ég hlakka til vetrarins og veit að við tökumst á við hann af æðruleysi,“ segir Hilmar í samtali við Víkurfréttir.

Hver eru stærstu málin í þínum skóla um þessar mundir?

Viðreisn
Viðreisn

„Vellíðan nemenda og starfsmanna sem eru búin að fara í gegnum tvo erfiða Covid-vetur. Ég vona svo hjartanlega að við getum haldið skólastarfinu sem eðlilegustu þetta skólaárið.“

Hvernig varðir þú sumarfríinu?

„Eins og fleiri sem búa á SV-horninu varði ég sumrinu á Austurlandi. Átti indæla daga á tjaldsvæðinu í Atlavík og naut alls þess besta sem þessi landshluti hefur upp á að bjóða.“

Hvað kom skemmtilega á óvart í sumar?

„Þegar vinir mínir frá Costa Rica-árunum boðuðu óvænt komu sína til Íslands og við áttum frábærar stundir eftir að hafa ekki sést í sautján ár.“

Áttu þér uppáhaldsstað til að sækja heim innanlands?

„Mér finnst þetta land svo stórkostlegt til ferðalaga að ég á erfitt með að gera upp á milli – en ef ég á að nefna einhvern uppáhaldslandshluta þá eru það Vestfirðir.“

Víkurfréttum lék forvitin á að vita hvernig Hilmar Egill myndi skipuleggja góða dagsferð með gesti á Suðurnesjum. Hann sagðist að sjálfsögðu byrja á stuttu rölti í Vogunum.

„Því næst færi ég á Garðskaga, Stafnes, Hafnir, Reykjanestá og Grindavík með öllum þeim flottu stoppum sem eru á leiðinni. Ég tæki með nesti fyrir hádegismatinn og endaði svo í mat hjá honum Þormari vini mínum á Papas í Grindavík, enda frábær staður fyrir svanga ferðalanga.“