Bygg
Bygg

Mannlíf

Margir þekktir leikarar stigu sín fyrstu leiklistarskref í Keflavík
Sunnudagur 26. september 2021 kl. 08:12

Margir þekktir leikarar stigu sín fyrstu leiklistarskref í Keflavík

Leikfélag Keflavíkur er 60 ára

Leikfélag Keflavíkur á rætur að rekja til ársins 1940 en driffjöðrin að stofnun leikstarfseminnar hér var Helgi S. Jónsson sem lék og starfaði í leikfélaginu einkum á árunum 1940–1950. Draga fór úr starfseminni eftir 1950, enda var þá orðið mikið um að vera í atvinnulífinu á svæðinu og tími manna minni fyrir vikið. Það var svo á haustdögum árið 1961 að þau tímamót urðu í sögu leiklistarstarfs á svæðinu, þegar nokkrir áhugamenn úr Keflavík og Njarðvík komu saman, og stofnað var sameiginlegt leikfélag, Leikfélagið Stakkur eftir klettadrangnum sem stóð undan Hólmsbergi utan við Keflavík. Leikfélagið Stakkur var stofnað þann 19. september 1961 og hélst svo til 1965 þegar Njarðvíkingar stofnuðu eigið félag. Leikfélagið Stakkur hélt nafninu sínu fram til ársins 1967 þegar Leikfélag Keflavíkur var stofnað og hefur það verið starfrækt allar götur síðan með einhverjum hléum þó.

Fyrst um sinn var Stapinn helsti vettvangur leiksýninga en svo bættist Félagsbíó við. Þó gerðist það nokkuð oft að leikhópar þurftu að leita í önnur húsnæði til æfinga og sýninga sem reyndist þreytandi fyrir leikhópa. Stórleikarinn Helgi Skúlason var einn þeirra sem léði félaginu lið á fyrstu starfsárum þess og varð kannski valdur að þeirri velgengni sem alltaf hefur einkennt starfsemina.

Guðný Kristjánsdóttir og Hulda Ólafsdóttir við opnun Frumleikhússins.

Árið 1997 afhenti Karlakór Keflavíkur Reykjanesbæ neðri hæðina á Vesturbraut 17 til eignar gegn því að þar yrði alltaf einhver menningartengd starfsemi. Þáverandi bæjarstjórn Reykjanesbæjar leysti svo húsnæðisvanda leikfélagsins þegar félagið fékk yfirráð yfir húsnæðinu og hefur séð um rekstur þess síðan. Með tilkomu Frumleikhússins leystist ekki aðeins húsnæðisvandi leikfélagsins heldur varð til fallegt menningarhús sem hefur komið að góðum notum fyrir fjölda viðburða, þó aðallega uppbyggingu öflugs leiklistarstarfs fyrir áhugaleiklistarfólk á öllum aldri.

Starfsemi leikfélagsins hefur verið óslitin síðan Frumleikhúsið var opnað og þegar þetta er skrifað hafa verið settar á svið 54 sýningar í Frumleikhúsinu ef rétt er talið og því er Fyrsti kossinn sú 55. og 100. sýning leikfélagsins frá stofnun þess.

Leikfélagið gekk í gegnum nokkur dvalatímabil á 7., 8. og 9. áratug síðustu aldar en síðan 1988 hefur leikfélagið sýnt a.m.k. tvær sýningar á ári, að undanteknu leikárinu 1996–1997 þegar leikfélagar stóðu í framkvæmdum á Frumleikhúsinu.

Leikfélag Keflavíkur er og hefur verið eitt öflugasta starfandi áhugaleikfélag landsins og stendur félagið að baki rekstri og gróskumiklu starfi innan Frumleikhússins. Starfið byggist eingöngu á áhugafólki og sjálfboðaliðum sem leggur metnað sinn í að bjóða upp á gott leiklistar- og menningarlíf í Reykjanesbæ. Nafnið „Frumleikhúsið“ á Sveindís Valdimarsdóttir en hún sendi félaginu blómvönd stuttu eftir opnun þess með ósk um farsælt starf í Frumleikhúsinu og þar með var nafnið komið. Áður höfðu komið upp hugmyndir eins og Skothúsið og Skjöldur.

Margir þekktir leikarar fengu fyrstu reynslu sína af leiklist í Keflavík, bæði fyrir árdaga Leikfélags Keflavíkur sem og innan félagsins. Þónokkrir hafa haldið í leiklistarnám og einhverjir hafa m.a. leikstýrt verkum hjá leikfélaginu eftir útskrift og einhverjir jafnvel stigið aftur á svið Frumleikhússins sem leikarar.

Leikfélagið setur upp a.m.k. tvær sýningar ár hvert ásamt því að taka þátt í ýmsum viðburðum bæjarins.

Frumleikhúsið

Frumleikhúsið var opnað formlega þann 4. október 1997 eftir áratuga baráttu fyrir húsnæði og síðan þá hefur Leikfélag Keflavíkur aldrei verið virkara. Þar hafa verið haldnar ráðstefnur, tónleikar, fundir og margt fleira. Stóri salurinn rúmar í kringum 120 manns í sæti og salurinn frammi rúmar vel leikhúsgesti. Starfsemin er til fyrirmyndar og þeir leikstjórar sem unnið hafa með okkur eru sammála um að hvergi finnist betri aðstaða áhugaleikfélags en hjá Leikfélagi Keflavíkur.

Félagar að standa í framkvæmdum árið 2020.

Framkvæmdir 1997

Bæjarstjórn Reykjanesbæjar fékk félaginu afnot af húsnæðinu í ársbyrjun 1997, ásamt tíu milljónum króna til framkvæmda. Yfirumsjón með verkefninu höfðu þeir Jón Páll Eyjólfsson og Júlíus Guðmundsson og lögðu þeir nótt og dag við verkið ásamt öðrum leikfélögum. Það þurfti að rífa niður, byggja upp, versla allt sem þurfti, eins og t.d. pallakerfi, sæti, ljósabúnað o.fl. Fjölmargir aðilar lögðu verkefninu lið auk Reykjanesbæjar og má þar m.a. nefna Harald Valbergsson á teiknistofunni Örk sem gaf allar teikningar, Vélaleigu Sigurjóns Helgasonar sem lagði til tæki og tól auk Keflavíkurverktaka sem einnig styrktu verkefnið.

Framkvæmdirnar tóku níu mánuði og það var stoltur hópur sem opnaði húsið almenningi með veisluhöldum 4. október 1997. Þar sem Guðný Kristjánsdóttir, þáverandi formaður, og bæjarstjórinn þáverandi, Ellert Eiríksson, klipptu loksins á borðann að inngangi leikhúss í Keflavík.

Framkvæmdir 2011

Leikfélagið fór svo í framkvæmdir árið 2011 en þá fengum við afnot af stærri hluta hússins, eða alla neðri hæðina. Við færðum búningageymslur, stækkuðum smíðaverkstæðið, tókum allt í gegn frammi í anddyri, flotuðum gólf, máluðum og margt fleira.

Framkvæmdir 2020

Í gegnum árin hefur leikfélagið ráðist í misstórar framkvæmdir en árið 2020 var ákveðið að taka aldeilis til hendinni. Skipt var um gólfefni á fremri sal, klósettin tekin í gegn, pallakerfið lagfært og leiksviðið stækkað.

Leikfélagar hafa alltaf lagt metnað í halda húsinu í góðu standi enda ekki vilji fyrir því að verða húsnæðislaus aftur. Allt í áhuga- og sjálfboðavinnu.

Auðvitað er saga Leikfélags Keflavíkur mun meiri en hér er upp talið en hér er aðeins stiklað á stóru og í vinnslu eru ítarleg skrif sögu Leikfélags Keflavíkur með viðtölum við fyrrverandi og núverandi félaga sem segja sögur úr leikhússtarfinu en eins og allir vita þá getur svona blómleg starfsemi aðeins gengið með mannskap sem hefur áhuga, þor og þrek til að gera hlutina og það fólk höfum við svo sannarlega haft innan vébanda þessa frábæra félags, Leikfélags Keflavíkur.

Brynja Ýr Júlíusdóttir.

Staðið í framkvæmdur árið 1997.