Nettó
Nettó

Mannlíf

Lokaorð Margeirs: Hvað kostar miðinn?
Margeir Vilhjálmsson.
Sunnudagur 14. apríl 2019 kl. 10:00

Lokaorð Margeirs: Hvað kostar miðinn?

Fyrst og fremst er fall flugfélagsins WOW meiriháttar áfall fyrir allt það góða fólk sem þar hafði vinnu. Það eru alltaf vonbrigði þegar störf tapast. Fjöldi starfa tapast líka hjá fyrirtækjum í flugtengdri starfsemi, en sem betur fer berast fréttir af því að önnur flugfélög séu að auka tíðni ferða sinna til Íslands. Icelandair hefur svo fengið nýjan erlendan fjárfesti. Í því liggja vonandi tækifæri.

Það er ekki gott fyrir sveitarfélögin á Suðurnesjum, þá sérstaklega Reykjanesbæ og Suðurnesjabæ, að vera með alltof hátt hlutfall eggjanna í sömu körfunni. Hagsæld sveitarfélaganna byggist á ferðaþjónustu og flugtengdri starfsemi. Ég er ekki frá því að kísilverið í Helguvík hafi litið mun betur út eftir að flugfélag Skúla Mogensen lenti á jörðinni. Það er nauðsynlegt að nýsköpun á svæðinu fái að blómstra til að tryggja fjölbreytt atvinnulíf.

Brotthvarf WOW af flugmarkaði er þess valdandi að flugmiðaverð til og frá Íslandi hefur snarhækkað. En hefur það haft einhver áhrif á flugmiðaverð yfir Atlantshafið? Sonur minn þurfti nú í vikunni að fara í vinnuferð til Parísar. Í lok vikunnar ætlaði hann svo til Boston. Niðurstaðan af skipulagningu ferðarinnar var sú að ódýrasta leiðin var að fara beint frá París til Boston með Norwegian, þar sem flugmiðinn kostaði 28.000 kr. aðra leiðina. Miðinn frá Íslandi til Boston var á 100.000 kr. hvora leið. Á sama tíma skrapp ég í dagsferð til Akureyrar fyrir 40.000 krónur. Það er erfitt að skilja þennan flugbransa. Tvennt er þó augljóst. Fyrir það fyrsta skapar hann mikilvæg og vel launuð störf í sveitarfélaginu. Það má kosta miklu til að halda þeim störfum á svæðinu. Í öðru lagi þá þarf virka verðsamkeppni í flugi fyrir íslenska neytendur. Ég er ekki endilega að tala um að komast til Boston fyrir 9.900 aðra leiðina. En það er mikill munur á 9.900 og 100.000. Ég er bara að biðja um að komast þangað fyrir sama verð og einhver sem býr í París, þótt vegalengdin héðan sé nokkuð styttri.

Ljósmyndastofa Oddgeirs
Ljósmyndastofa Oddgeirs