Sigurjón Rúnarsson framlengir við Grindavík

Varafyrirliði Grindvíkinga, varnarmaðurinn Sigurjón Rúnarsson, hefur skrifað undir nýjan samning við Grindavík og mun leika með liðinu næstu tvö keppnistímabil. Sigurjón er tvítugur og lék nítján leiki með Grindavík í deild og bikar í ár. Hann skoraði jafnframt tvö mörk í sumar.

Sigurjón hefur, þrátt fyrir ungan aldur, fest sig í sessi sem einn af lykilleikmönnum Grindavíkur, hann var varafyrirliði liðsins í sumar og er öflugur varnarmaður. Sigurjón hefur leikið 53 leiki með Grindavík í deild og bikar á ferlinum.

„Það er gleðiefni að Sigurjón verði áfram í herbúðum Grindavíkur. Þetta er leikmaður sem býr yfir miklum hæfileikum og getur svo sannarlega orðið frábær miðvörður þegar fram líða stundir. Hann hefur tekið miklum framförum í sumar, er feikilega vinnusamur og hefur mikið og stórt Grindavíkurhjarta,“ segir Sigurbjörn Hreiðarsson, þjálfari Grindvíkinga, á vef félagsins.