Lengjudeild karla: Erfið byrjun hjá Njarðvík - Fjórða jafnteflið hjá UMFG
Njarðvíkingar hafa byrjað brösuglega í Lengjudeild karla í knattspyrnu en þeir gerðu markalaust jafntefli gegn Ægi, neðsta liði deildarinnar á JBÓ vellinum í Njarðvík í gær. Grindvíkingar gerðu sömuleiðis 0:0 jafntefli á föstudagskvöld gegn Leikni úr Reykjavík.
Heimamönnum í Njarðvík gekk illa að búa sér til marktækifæri en gerðu það þó í blálokin þegar þeir áttu dauðfæri og skot í stöng en inn vildi boltinn ekki og niðurstaðan 0:0, vonbrigði fyrir heimamenn sem eru í þriðja neðsta sæti deildarinnar með fimm stig.
Grindvíkingar eru í betri málum og eru í 5. sæti deildarinnar, þó aðeins tveimur stigum meira en UMFN, með 7 stig. UMFG er eina taplausa liðið í deildinni en hafa gert fjögur jafntefli og því er stigasöfnunin ekki í takti við þá staðreynd.
