Kári og Kamel tryggðu Keflavík farmiðann á Laugardalsvöll
Keflavík réði lögum og lofum þegar Keflavík og ÍR mættust í fyrri undanúrslitaleiknum og höfðu þriggja marka forskot fyrir leikinn í dag eftir 4:1 sigur. ÍR-ingar voru hins vegar ekki reiðubúnir að leggja árar í bát og jöfnuðu einvígið í fyrri hálfleik. Kári Sigfússon og Sami Kamel skoruðu sitt markið hvor og tryggðu Keflavík farseðilinn í úrslitaleikinn á Laugardalsvelli.
Keflavík - ÍR 2:3
Heimamenn virtust hálfværukærir í upphafi leiks á meðan baráttuglaðir ÍR-ingar gáfu allt í leikinn og sóttu stíft. Það skilaði sér fljótlega og eftir þrettán mínútna leik skoraði Guðjón Máni Magnússon fyrir gestina. Hann var aftur á ferðinni þremur mínútum síðar (16’) og tvöfaldaði forystuna en gestirnir voru ekki hættir og Bragi Karl Bjarkason skoraði þriðja mark ÍR á 35. mínútu.
Þegar þarna var komið við sögu var skyndilega allt orðið jafnt í einvíginu (4:4) og bæði lið komin á byrjunarreit.
Stuðningsmenn Keflvíkinga fannst því kærkomið þegar Kári Sigfússon minnkaði muninn í uppbótartíma (45’+1) og Keflavík aftur komið með yfirhöndina í einvíginu.
Keflvíkingar rifu sig upp og mættu ákveðnari í seinni hálfleik. Sami Kamel og Sindra Snæ Magnússyni var skipt inn á og á 69. mínútu skoraði Kamel annað mark Keflavíkur eftir fyrirgjöf frá Kára.
Mörkin hefðu getað orðið fleiri beggja megin vallarins en lokatölur urðu 2:3 og Keflavík mætir því annað hvort Aftureldingu eða Fjölni í úrslitum á Laugardalsvelli næstkomandi laugardag.
Jóhann Páll Kristbjörnsson, íþróttafréttaritari Víkurfrétta, tók viðtöl við Frans Elvarsson, fyrirliða, og Hólmar Örn Rúnarsson, aðstoðarþjálfara Keflavíkur, eftir leik. Viðtölin má sjá í spilurunum hér að neðan. Myndasafn er neðst á síðunni.
Keflavík - ÍR (2:3) | Umspil Lengjudeildar karla 22. september 2024
