Birgitta með fimm mörk í stórsigri Grindavíkur
Grindavík bauð upp á sjóðheita markasúpu á Grindavíkurvelli í kvöld þegar heimakonur tóku á móti Álftanesi í fjórðu umferð í 2. deild kvenna á Íslandsmótinu í knattspyrnu. Lokastaðan varð 6:0 fyrir Grindavík.
Grindavík byrjaði leikinn af krafti og gestirnir sáu aldrei til sólar. Staðan í hálfleik var 3:0 fyrir Grindavík. Una Rós Unnarsdóttir opnaði markareikninginn hjá Grindavík á tólftu mínútu. Eftir það tók Birgitta Hallgrímsdóttir við og raðaði inn mörkum. Hún hafði skorað fimm mörk áður en flautað var til leiksloka. Tvö markanna gerði hún í fyrri hálfleik og bætti við þremur í þeim síðari.
Birgitta Hallgrímsdóttir skorar eitt af fimm mörkum sínum í kvöld. Ótrúlegur leikur hjá þessari mögnuðu knattspyrnukonu.
Hér að neðan er upptaka af leiknum. Einnig er myndasafn frá viðureign kvöldsins neðar á síðunni.
Grindavík - Álftanes | 2. deild kvenna
