Íþróttir

Átta Íslandsmeistaratitlar
Kvennasveit ÍRB sló unglingametið í 4 x 50 metra fjórsundsboðsundi. Myndir: ÍRB
Jóhann Páll Kristbjörnsson
Jóhann Páll Kristbjörnsson skrifar
miðvikudaginn 23. nóvember 2022 kl. 09:14

Átta Íslandsmeistaratitlar

Íslandsmeistaramótið í sundi í 25 metra laug fór fram í Ásvallalaug um síðustu helgi. Sundfólk ÍRB stóð sig gríðarlega vel á mótinu en liðið vann til átta Íslandsmeistaratitla og í heildina til 35 verðlauna. Fjórir sundmenn syntu sig inn í landsliðshópinn fyrir NM og kvennasveit ÍRB sló unglingametið í 4 x 50 metra fjórsundsboðsundi.

Sundfólkið var ekki bara að vinna marga titla heldur voru gæði sundanna mjög mikil á alþjóðlegan mælikvarða. Til marks um mikil gæði þá féllu alls fjörutíu og fjögur innanfélagsmet, það elsta var frá 2001.

Optical studio
Optical studio

Að loknu Íslandsmóti á ÍRB fjóra fulltrúa í landsliði SSÍ sem keppir í desember á Norðurlandamótinu í Bergen. Það eru þau Eva Margrét Falsdóttir, Fannar Snævar Hauksson, Guðmundur Leo Rafnsson og Sunneva Bergmann Ásbjörnsdóttir.

Þessi fjögur verða fulltrúar ÍRB í landsliði Íslands á Norðurlandamótinu í næsta mánuði.

Íslandsmeistarar á ÍM 25 2022

Eva Margrét Falsdóttir varð Íslandsmeistari í fimm greinum; 100 metra fjórsundi, 200 metra bringusundi, 400 metra fjórsundi, 100 metra bringusundi og 200 metra fjórsundi. 

Fannar Snævar Haukson varð Íslandsmeistari í tveimur greinum; 50 metra baksundi og 100 metra baksundi.
Guðmundur Leo Rafnsson varð Íslandsmeistari í 200 metra baksundi.