Aftur á parketið

Körfuknattleikssamband Íslands (KKÍ) hefur birt uppfærða leikjadagskrá og hefst Domino's-deild kvenna leik að nýju þann 4. nóvember næstkomandi en Domino's deild karla degi síðar. Þá hefur hefur KKÍ einnig gefið út Aftur á parketið - Leiðbeiningar um endurræsingu keppnistímabils Domino's og 1. deilda eftir hlé vegna sóttvarnarráðstafana yfirvalda. Leiðbeiningarnar eru aðgengilegar á heimasíðu KKÍ.

Keflavík tekur á móti Skallagrími í Domino's-deild kvenna og í Domino's-deild karla mætast Suðurnesjaliðin Njarðvík og Grindavík í Ljónagryfjunni en í Keflvíkingar mæta Stjörnunni á útivelli.

Í fyrstu deild kvenna taka Njarðvíkingar á móti Ármanni þann 9. nóvember en Grindavík leikur gegn Hamar/Þór í Hveragerði þann 10. nóvember.

Leikirnir hefjast klukkan 19:15.

Í næstu viku fer mótanefnd KKÍ í að skoða leiki í yngri flokkum og neðri deildum.

---

Í tilkynningu frá Körfuknattleikssambandinu segir: „Leiðbeiningarnar Aftur á parketið eru unnar í góðri samvinnu við heilbrigðisteymi KKÍ og fræðasamfélagið en meðal annars er byggt á góðum restart leiðbeiningum FIBA. Aftur á parketið er hugsað sem eins konar leiðarvísir eða leiðbeiningar til þeirra félaga sem þurfa að koma afreksíþróttamönnum sínum aftur í gang eftir það æfingastopp sem hefur verið á höfuðborgarsvæðinu síðustu vikurnar. Það er von þeirra er að þessari vinnu koma að þessar leiðbeiningar geti liðsinnt aðildarfélögum KKÍ við að skipuleggja sína leið aftur á parketið.​“

Bikarkeppni karla

Stjórn KKÍ hefur ógilt bikardráttinn sem fram fór 1. október síðastliðinn og boðar breytingar á fyrirkomulagi bikarkeppninnar. Öll tólf lið Domino's-deildar karla fara beint í sextán liða úrslit en sérstök undankeppni verður leikin í fyrstu deild, það þýðir að lið úr annari og þriðju deild taka ekki þátt í bikarkeppninni í ár. Umræddar breytingar ná ekki yfir bikarkeppni kvenna þar sem konurnar fara beint í sextán liða úrslit.

Stjórn KKÍ tók þessa ákvörðun þar sem leikjadagskrá verður mun þéttari í efstu deildum eftir þær samkomutakmarkanir sem hafa verið í gildi undanfarnar vikur og því fækkar mögulegum leikdögum í bikarkeppninni.

Fyrirkomulagið verður eftirfarandi:

• Öll lið Domino's-deildar karla fara beint í sextán liða úrslit bikarkeppninnar.
• Öll lið 1. deildar leika undankeppni meðan landsleikjagluggi karla stendur yfir um að komast í sextán liða úrslit bikarkeppninnar. Undankeppnin fer svona fram:
• Leikin er forkeppni milli tveggja liða fyrstu deildar karla. Það kemur ljós í bikardrættinum hvaða tvö lið þurfa að leika forkeppni.
• Það lið sem vinnur leikinn í forkeppni kemst í pottinn með þeim sjö liðum fyrstu deildar karla sem eftir eru. Dregið verður um hvaða lið mætast en þau fjögur lið sem vinna komast í sextán liða úrslit bikarkeppni KKÍ.

Nokkur atriði úr dagatalinu sem vert er að benda á: COV-L leikir í dagatalinu er svigrúm til að leika þá leiki sem fresta þarf vegna sóttkvíar eða einangrunar leikmannahópa. Annað svigrúm í dagatalinu verður einnig notað til leikja sem frestað hefur verið vegna sóttkvíar eða einangrunar leikmannahópa. Í Domino's-deild karla verður leikið 20., 23. og 27. desember og 3. janúar. Leiktímar gætu dreifst að einhverju leyti innan viðkomandi daga þar sem gert er ráð fyrir fleiri leikjum í beina útsendingu hjá Stöð 2 Sport. Eins og kemur fram að ofan, þá hafa 32 liða úrslit bikarkeppni KKÍ verið felld út. Sextán liða úrslit verða leikin þar sem átta liða úrslit voru áður fyrirhuguð. Átta liða úrslit bikarkeppni kvenna verða leikin 27. desember og átta liða úrslit bikarkeppni karla verða leikin 30. desember. Landsleikjagluggar karla og kvenna lengjast vegna sóttkvíar leikmanna þegar heim er komið. Gætt er að því að ganga ekki á það svigrúm sem er til staðar í febrúar og mars eins og hægt er.