Stuðlaberg Pósthússtræti

Fréttir

Lögreglan á hlaupum eftir vímuðum ökuþórum
Laugardagur 27. febrúar 2021 kl. 11:16

Lögreglan á hlaupum eftir vímuðum ökuþórum

Ökumaður sem lögreglan á Suðurnesjum hafði afskipti af í vikunni, vegna gruns um að hann æki undir áhrifum fíkniefna, tók sprettinn af vettvangi. Lögreglumaður hljóp á eftir honum og var hann handtekinn. Hann var látinn laus eftir sýnatökur og skýrslutöku á lögreglustöð.

Þá þurfti lögregla að hlaupa uppi annan ökumann sem reyndi að stinga af. Hann var grunaður um að hafa ekið bifreið sinni ofan í skurð og verið að reyna að aka henni aftur upp úr honum þegar hann var truflaður við þá iðju. Hann hafði áður verið sviptur ökuréttindum og var með meint fíkniefni á sér. Hann var handtekinn og færður á lögreglustöð.

Lögregla veitti svo þriðja ökumanninum eftirför drykklangan spöl þar sem hann sinnti ekki stöðvunarmerkjum. Hann hafði ekið á miklum hraða, meðal annars yfir hringtorg sem á vegi hans varð. Hann var handtekinn vegna gruns um akstur undir áhrifum áfengis.
Einn ökumaður til viðbótar ók án ökuréttinda. Hann var grunaður um fíkniefnaakstur.