Nettó
Nettó

Fréttir

Hæsta grenitré á Suðurnesjum dauðvona eftir skemmdarverk
Sárið eftir skemmdarverkið á trénu. Lífslíkur þess eru ekki nema 5% segir skógfræðingur.
Hilmar Bragi Bárðarson
Hilmar Bragi Bárðarson skrifar
þriðjudaginn 25. júní 2019 kl. 18:40

Hæsta grenitré á Suðurnesjum dauðvona eftir skemmdarverk

Börkur hefur verið skorinn af stofni á einu hæsta grenitrénu í skógræktinni í Háabjalla í landi Sveitarfélagsins Voga. Um 20 sentimetra hluti hefur verið skorinn úr berkinum allan hringinn en sárið er í um það bil eins og hálfs metra hæð, segir í færslu sem Oktavía Jóhanna Ragnarsdóttir‎ skrifar á fésbókarsíðu Skógfells, skógræktarfélags í Vogum

Skógrækt hófst á Háabjalla 1948 en þar hafa mælst hæstu tré á Suðurnesjum. Oktavía segir að haft var samband við skógfræðing hjá Skógræktarfélagi Íslands en hann taldi lífslíkur trésins afar litlar eða einungis um 5%.

„Þó var ráðist í að flytja börk af nýfelldu tré og líma hann yfir sárið með þá von í brjósti að það muni bjarga lífi þessa öldungs,“ segir í færslunni.

Stjórn og félagsmönnum Skógfells er það mikil ánægja að þeim fari fjölgandi sem njóta útivistar í fagurri náttúru skógarins og nærsvæða hans.

„Öll umgengni hefur verið til fyrirmyndar, við vorum því virkilega sorgmædd að sjá skemmdirnar og létum lögreglu vita,“ skrifar Oktavía Jóhanna Ragnarsdóttir.

Börkur af nýfelldu tré var límdur á stóra grenitréð í von um að hægt verði að bjarga lífi þess.

Ljósmyndastofa Oddgeirs
Ljósmyndastofa Oddgeirs