Yfir 5 þúsund vinningar í Jólalukku VF - miðar komnir í verslanir

Hin sívinsæla Jólalukka Víkurfrétta er hafin með fleiri vinningum en nokkru sinni fyrr í tólf ára sögu þessa vinsæla skafmiðaleiks sem vart þarf að kynna fyrir Suðurnesjamönnum. Sextán verslanir og fyrirtæki í Reykjanesbæ bjóða upp á Jólalukku í ár.

Vinningar eru 5200 talsins og heildarverðmæti þeirra er vel yfir 5 milljónir króna. Þar af eru 12 Evrópuferðir með Icelandair, 16 gjafabréf í Nettó eða Kaskó að upphæð 15 þúsund krónur hvert. Stærsta gjafabréfið er upp á 100 þúsund krónur í Nettó Njarðvík. Auk þess er fjöldi annarra vinninga, smærri og stærri. Þessi skemmtilegi og viðamikli jólaleikur hefur verið samstarfsverkefni Víkurfrétta og verslana á Suðurnesjum og er markmið hans að auka jólastemmninguna í desember. Þeir sem gera jólainnkaup í þeim verslunum sem bjóða Jólalukkuna geta átt von á glæsilegum vinningum. Nettó og Kaskó, verslanir Samkaupa hafa verið stærstu samstarfsaðilar Víkurfrétta í Jólalukkunni og koma myndarlega að henni eins og undanfarin ár með samstarfsaðilum sínum eins og Ölgerðinni og Vífilfelli sem hafa verið með frá upphafi.

Fyrirkomulagið í Jólalukkunni er einfalt. Þegar verslað er fyrir 5000 krónur í þeim verslunum sem taka þátt í Jólalukkunni fá viðskiptavinir afhentan Jólalukkumiða og sjá um leið hvort vinningur er á miðanum. Fólk getur þá nálgast vinninginn strax hjá viðkomandi verslun eða þjónustuaðila. Ef það leynist hins vegar ekki vinningur á miðanum er ekki öll von úti því hægt er að setja nafn sitt á bakhlið miðans og skila honum í lukkupotta sem staðsettir eru í Kaskó og í Nettó. Úr lukkupottunum verða dregnir veglegir vinningar þrisvar sinnum fram að jólum. Vinningar í úrdrættinum eru m.a. 100 þúsund króna matarúttekt, þrír Evrópufarmiðar með Icelandair og fleiri góðir vinningar. Heildarverðmæti vinninga í Jólalukkunni er yfir 5 milljónir króna. Auk þeirra verslana sem taka beinan þátt í Jólalukkunni eru fjölmörg fyrirtæki á svæðinu sem leggja til vinninga. Leikurinn stendur yfir fram að jólum eða á meðan upplag miða endist.

Jólalukkan fæst á eftirtöldum stöðum: Nettó, Kaskó, Kóda, K-sport, Gallerí Keflavík, Georg V Hannah, Skóbúðinni, Lyfju, Efnalauginni Vík, Eymundsson, Lyfjum og heilsu, Krummaskuði, Omnis, SI Verslun, Heilsuform og Bílahóteli.

Nánari upplýsingar um Jólalukkuna er að finna í auglýsingu í Víkurfréttum og á skrifstofu VF.