Viðskipti

WOW air hefur flug til Arlanda flugvallar í Stokkhólmi
Miðvikudagur 17. ágúst 2016 kl. 11:48

WOW air hefur flug til Arlanda flugvallar í Stokkhólmi

Frá og með 18. nóvember næstkomandi mun WOW air breyta áætlunarleið sinni til Svíþjóðar svo lent verði á Arlanda flugvelli í stað Västerås flugvallar en flugfélagið hóf áætlunarflug til Stokkhólms síðastliðinn maí. Sala til Arlanda flugvallar hefst í dag og boðið verður áfram upp á flug fjórum sinnum í viku, á sunnudögum, mánudögum, miðvikudögum og föstudögum. Arlanda flugvöllur er stærsti flugvöllur Svíþjóðar og mikilvægur tengiflugvöllur sem býður upp á flug til fjölda áfangastaða, bæði í Mið-Austurlöndum og Asíu. Frá Arlanda flugvelli eru greiðar samgöngur en aðeins tekur um 18 mínútur að ferðast frá vellinum til miðborgar Stokkhólms með lest.

Í Svíþjóð búa um 9 milljónir manna og er landið fjölmennasta land Skandinavíu. Ferðamönnum frá Svíþjóð hefur fjölgað síðustu ár og eru Svíar í 7. sæti yfir þær þjóðir sem hafa mest sótt Ísland heim á þessu ári. Frá janúar til byrjun ágúst komu 31.189 Svíar til landsins. Einnig býr fjöldi Íslendinga við nám og störf í Svíþjóð sem nýtur góðs af lágu flugverði til Íslands.

Frá því að WOW air hóf áætlunarflug frá Svíþjóð í maí síðastliðnum hefur sænskum ferðamönnum fjölgað umtalsvert á Íslandi. Ef tekið er mið af júnímánuði þessa árs og miðað við sama mánuð í fyrra er aukningin rétt tæp 50%. Þetta er langt umfram almenna aukningu ferðamanna á Íslandi og sérstaklega merkileg niðurstaða í ljósi þess að ferðamönnum frá Svíþjóð í júní fækkaði um tæp 17% frá 2014 til 2015.

„Það er ánægjulegt að bjóða nú flug til Arlanda flugvallar en með því opnast möguleikar fyrir farþega okkar að fljúga áfram til Asíu og Mið-Austurlanda en fjöldinn allur af flugfélögum bjóða upp á flug þangað frá Arlanda flugvelli. Við höfum fengið frábærar móttökur frá farþegum okkar síðan við hófum flug til Svíðþjóðar og vonum að með þessari breytingu getum við þjónað farþegum okkar enn frekar,“ segir Skúli Mogensen forstjóri og stofnandi WOW air.

„Við erum virkilega spennt að fá WOW air til Arlanda flugvallar því það þýðir að ferðamönnum okkar bjóðast nú auknar samgöngur til Íslands auk snöggra tenginga á Keflavíkurflugvelli til áfangastaða í Bandaríkjunum og Kanada. Arlanda flugvöllur mun á næstu misserum verða einn af fáum flugvöllum í heiminum þar sem boðið er upp á bandarískt landamæraeftirlit við brottför sem einfaldar enn frekar ferðalög á milli Svíþjóðar og Bandaríkjanna,“ segir Kjell-Åke Westin, flugvallarstjóri á Arlanda flugvelli.

Public deli
Public deli