Víkurfréttir á Netinu vinsælar með morgunkaffinu!

Víkurfréttir á Netinu eru vinsælar með morgunkaffinu. Það er ein af niðurstöðum mælinga Virkrar vefmælingar á heimsóknum á vefsetur Víkurfrétta. Þá sýna mælingar Virkrar vefmælingar það að Víkurfréttir á Netinu eru á meðal 10-20 vinsælustu vefsvæða á Íslandi. Það skal þó tekið fram að Víkurfréttir eru ekki skráðar inn á lista Virkrar vefmælingar.Mjög margir virðast byrja vinnudaginn með því að heimsækja Víkurfréttir á Netinu og þá kemur mikill toppur í heimsóknir. Upp úr kl. 09 jafnast umferðin um síðuna og helst nokkuð jöfn yfir daginn. Síðdegis dregur svo úr heimsóknum og kl. 17 kemur lægð, enda margir á leið heim úr vinnu. Lægðin varir ekki lengi, því fréttaþyrstir eru fljótt komnir á netið heima hjá sér og umferð vex aftur fram undir miðnætti.
Það vekur meðal annars athygli okkar hjá Víkurfréttum að við eigum stóran og tryggan hóp lesenda hjá Varnarliðinu. Í gær fengum við um 150 heimsóknir frá rótarléninu navy.mil. Þá eru Suðurnesjamenn í Danmörku tíðir gestir á vefsvæði Víkurfrétta. Í gær komu rétt um 50 heimsóknir frá Danmörku. Daglega fáum við heimsóknir frá nær öllum helstu ríkjum vestur-Evrópu og fréttaþyrstir Suðurnesjamenn á sólarströnd virðast duglegir að kíkja á Netið til að næla sér í fréttir að heiman. Þannig sáust heimsóknir frá Spáni, Portúgal og Ítalíu í gær, svo eitthvað sé nefnt.
Víkurfréttir á Netinu eru skoðaðar út um allan heim og í nær öllum tímabeltum heimsins. Þannig komu í gær á sjötta tug heimsókna frá því tímabelti sem er sjö tímum á eftir íslenska tímanum (Ameríka). Einnig vöktu 24 heimsóknir frá tímabelti sem er 11 tímum á eftir okkar tíma athygli og sex heimsóknir frá tímabelti sem er 12 tímum á undan okkar tíma. Það er austan við Ástralíu og getu verið heimsóknir frá Nýja Sjálandi, enda vitað til þess að þar eru Suðurnesjamenn að gera það gott.

Við notum því tækifærið og sendum bestu Sumarkveðjur frá Íslandi til lesenda Víkurfrétta á Netinu út um allan heim. Okkur þykir einnig alltaf gaman að fá viðbrögð lesenda á Netinu og bendum á hnappinn netföng á forsíðu og þeir sem ekki eru með póstforrit geta einnig farið í hnappinn fréttaskot á forsíðu.

Gestabók verður gerð virk á síðunni innan skamms.