Úrval Útsýn og Plúsferðir hætta í Reykjanesbæ

Ferðaskrifstofa Íslands sem rekur Úrval Útsýn og Plúsferðir hefur sagt upp samningi við SBK hf.
Frá og með 1. febrúar 2005 verður engin þjónusta hjá þessari ferðaskrifstofu nema í Reykjavík, Akureyri og í Vestmannaeyjum.  Ferðaskrifstofa Íslands hefur sagt upp öllum samningum við umboðsaðila á landsbyggðinni utan Akureyri og Vestmannaeyjar, þ.m.t. SBK í Reykjanesbæ.  Þessa ákvörðun tekur Ferðaskrifstofa Íslands einhliða og þrátt fyrir mótmæli okkar og annarra umboðsaðila.  Þróunin hefur verið sú að sífellt eykst sala á internetinu, en þrátt fyrir það, er töluverður fjöldi fólks sem áfram vill koma í umboðið, fá upplýsingar og ræða um sína ferðatilhögun.
Við hjá SBK hf höfum fundið fyrir þörf fyrir þetta umboð og velvilja Suðurnesjamanna í okkar garð og hörmum því þessa ákvörðun Ferðaskrifstofu Íslands.
Áfram verður til Ferðaskrifstofa SBK og við munum áfram sinna hópum í ferðalögum bæði innanlands og til útlanda.  Áfram munum við sinna þjónustu og farseðlaútgáfu fyrir Flugleiðir, fyrir einstaklinga, fyrirtæki og hópa stóra sem smáa.
Starfsfólk SBK hf.