Tíðarfar spilar mest inn í verslun

„Verslunarmenn eru aldrei rólegir fyrr en á hádegi á aðfangadag en verslun hefur gengið
vel hér á Suðurnesjum fram að þessu,“ sagði Ómar Valdimarsson, framkvæmdastjóri
Samkaupa í samtali við Víkurfréttir og bætti því við að Samkaupamenn væru nokkuð
sáttir við jólatraffíkina.

„Við rekum búðir víða um allt land en erfitt er að mæla neyslu á hverjum stað
fyrir sig. Við erum ekki að sjá atvinnuleysið hafa mikil áhrif á verslun hjá okkur á
Suðurnesjum. Fjöldi viðskiptavina í Nettó búðinni í Krossmóa hefur aukist og greinilegt
að Suðurnesjamönnum líka vel þær breytingar sem þar hafa orðið, staðsetningin
góð og margir þjónustuaðilar í verslunarkjarnanum styrkja Krossmóasvæðið í heild.
Tíðafar hefur mikil áhrif á hvar fólk kaupir inn, sé veður gott gerir fólk sér frekar ferð á
höfuðborgarsvæðið og verslar þá í leiðinni. En auðvitað eiga Suðurnesjamenn að versla á
Suðurnesjum þar sem hægt er að versla næstum allt fyrir jólin,“ sagði Ómar.

Mynd: Mynd tekin í einni af verslunum Samkaupa hf.