Suðurnesjafólk í topp stöðum hjá Wow air

Keflavíkurmærin Inga Birna Ragnarsdóttir hefur verið ráðin aðstoðarforstjóri Wow air en hún gegnir um leið stöðu framkvæmdastjóra sölu- og markaðssviðs fyrirtækisins en sviðin tvö voru nýlega sameinuð.

Í frétt Viðskiptablaðsins kemur fram að Inga Birna hafi verið hægri hönd Skúla Mogensen við rekstur fyrirtækisins. Mun hún þannig stýra stærstum hluta starfseminnar hér á landi í fjarveru Skúla sem hyggst flytja til London en gegna þó áfram stöðu forstjóra, þó hann muni hafa mikla viðveru hér á landi.

Annar Suðurnesjamaður, Björn Ingi Knútsson, fyrrverandi flugvallarstjóri á Keflavíkurflugvelli, var nýlega ráðinn framkvæmdastjóri flugrekstrarsviðs og mun hann þannig stýra stórum hluta af rekstri félagsins, m.a. því ferli að sækja um flugrekstrarleyfi.

Það er því óhætt að segja að Keflavíkur-andi svífi yfir vötnum hjá Wow því Skúli sjálfur á ættir sínar að rekja til bítlabæjarins. Anna Skúladóttir, móðir hans, ólst upp á Tjarnargötunni í Keflavík þar til hún flutti til Reykjavíkur.