SpKef tekur við VÍS í Grindavík

Afgreiðsla VÍS hefur flust inn í útibú Sparisjóðsins í Grindavík og mun Dröfn Vilmundardóttir áfram þjónusta viðskiptavinum VÍS í Grindavík. Þetta kemur fram í tilkynningu frá SpKef.

Þá hefur Helgi Bogason tekið við stjórn útibús Sparisjóðsins í Grindavík. Hann tekur við af Elínu Aspelund sem hefur starfað í afgreiðslunni frá opnun hennar 1987. Elín hefur verið merkisberi Sparisjóðsins í Grindavík og skipað honum þann sess í hugum viðskiptavina að óvíða á landinu upplifa menn persónulegri þjónustu. Helgi starfaði áður í Landsbankanum og er Grindvíkingum að góðu kunnur af sínum störfum, bæði í sínu fagi og á íþróttasviðinu. Fótboltinn hefur fylgt honum frá því hann var leikmaður með Grindavík og síðan kom hann einnig að þjálfun liðsins og yngri flokkanna til fjölda ára. Helgi þjálfar nú Njarðvíkurliðið í knattspyrnu sem leikur í 1. deild að ári.

Ljóst er að viðskiptavinir Sparisjóðsins og VÍS eiga eftir að njóta góðs af þessum aukna liðsstyrk og þeim breytingum sem þeim eru samfara. Sem dæmi má nefna að félagar í Vildarþjónustu Sparisjóðsins njóta 5% afsláttar af tryggingum frá VÍS.

(Á mynd 1: Helgi Bogason, Dröfn Vilmundardóttir, Kristín Bragadóttir, Ólöf Guðlaugsdóttir, Elín Aspelund og Sigurbjörg Ásgeirsdóttir. Mynd2: Helgi Bogason sem tekur við stjórn útibúsins í Grindavík og Elín Aspelund sem lætur af störfum í Grindavík.)