SpKef tekur við afgreiðslu Landsbankans í Sandgerði

Landsbanki Íslands og Sparisjóðurinn í Keflavík hafa gert samkomulag um kaup Sparisjóðsins á afgreiðslu Landsbankans í Sandgerði. Sparisjóðurinn mun taka við öllum eignum og skuldum afgreiðslunnar þann 5. mars n.k.

Sparisjóðurinn mun einnig taka við samningi um póstafgreiðslu í Sandgerði sem Landsbankinn og Íslandspóstur eru aðilar að. Þetta kemur fram í fréttatilkynningu frá bönkunum.

Til hægðarauka fyrir viðskiptavini afgreiðslunnar munu einungis bankanúmer þeirra breytast en öll reikningsnúmer haldast óbreytt. Sparisjóðurinn mun senda viðskiptavinum nánari upplýsingar um framkvæmdina á næstu dögum.

Engar uppsagnir starfsmanna í tengslum við söluna eru fyrirhugaðar og hefur núverandi starfsmönnum Landsbankans í Sandgerði verið boðin störf hjá Sparisjóðnum.