Spiral fatahönnunarfyrirtækið eins árs

Spiral fatahönnunarfyrirtækið sem er eitt af nýsköpunarfyrirtækjunum á Suðurnesjum fagnaði nýlega eins árs afmæli. Því var fagnað með léttu teiti í húsakynnum þess að Hafnargötu 12 í Keflavík.

„Þetta hefur verið ævintýri líkast. Ein lítil kvöldstund við saumavélina er orðin að alvöru fyrirtæki og nú snúum við okkur að þessu af fullum krafti eftir að hafa sinnt þessu í aukavinnu fram að þessu,“ segja þær Íris Jónsdóttir og Yngunn Yngvadóttir.

Þær viðurkenna að þær hafi stóra drauma inni í framtíðinni. Nú þegar sé Spiral fatnaður seldur í Fríhöfninni, hjá þeim sjálfum í Keflavík og í Reykjavík en einnig á Akureyri og í Vestmannaeyjum. Reykjavíkursvæðið sé þó ennþá nánast ósnert. Þá séu í skoðun nýir spennandi möguleikar í framleiðslunni. „Við hlökkum til að vakna á morgnana. Það er svo gaman að vera að skapa nýja hluti á hverjum degi,“ sögðu þær Íris og Yngunn að lokum.

Ítarlegra viðtal við þær Írisi og Yngunni verður í prentútgáfu Víkurfrétta á fimmtudaginn. Fleiri myndir frá afmælishófinu eru þó komnar inn á vf.is. Smellið hér til að sjá þær.

Fjöldi gesta kom til að samfagna þeim Írisi og Yngunni á afmæli Spiral. Sigríður Klingenberg var ein af þeim og vakti lukku.