Sparisjóðurinn í Keflavík óskar eftir 20% framlagi ríkissjóðs

Sparisjóðurinn í Keflavík er einn þriggja sparisjóða sem óskað hafa eftir því að nýta sér heimild í neyðarlögum um að ríkissjóður leggi þeim til 20% af bókfærðu eigin fé eins og það var í árslok 2007. Frá þessu er greint á viðskiptasíðu Vísis.is. Einnig eru Sparisjóður Norðfjarðar og Byr með samskonar ósk.

Steingrímur J. Sigfússon fjármálaráðherra segir í samtali við Vísir.is að hann eigi von á að erindi þessara sparisjóða verði afgreitt hratt og vel af hálfu stjórnvalda.

„Þessi mál fara í ákveðið ferli hjá okkur þar sem þess er gætt að eitt gangi yfir alla það er að jafnræðisreglan gildi," segir Steingrímur. "Að lokinni þessari skoðun tökum við svo ákvörðun."

Samkvæmt neyðarlögunum frá því í haust getur ríkissjóður lagt sparisjóðum til fjárhæð sem nemur allt að 20% af bókfærðu eigin fé í árslok 2007, gegn stofnfjárbréfum í viðkomandi sparisjóði, sem endurgjald í samræmi við það eignfjárframlag sem lagt er til.