Skólar fjölga heilsueflandi leikskólum

„Við erum að bæta við einum sex deilda heilsuleikskóla í Suður-nesjabæ. Áætlað er að hann opni í mars á næsta ári. Þetta verkefni er mikil áskorun en mjög spennandi,“ segir Kristín Margrét, framkvæmdastjóri fyrirtækisins Skóla ehf.

Fyrir rekur Skólar ehf. fimm heilsuleikskóla á höfuðborgarsvæðinu og Suðurnesjum en fyrirtækið var stofnað árið 2000 af feðgunum Guðmundi Péturssyni og Pétri Guðmundssyni utan um rekstur leikskóla undir einkunnarorðunum „heilbrigð sál í hraustum líkama“.

„Fyrsti heilsuleikskólinn sem við opnuðum var Krókur í Grindavík en hann hóf starfsemi í febrúar 2001. Heilsuleikskólinn Kór í Kópavogi opnaði svo árið 2006.

Heilsu-„ungbarnaleikskólinn“ Ársól í Reykjavík og Heilsuleikskólinn Skógarás á Ásbrú opnuðu 2008 og einnig Hamravellir en hann færðist yfir til Hafnafjarðarbæjar árið 2020 samkvæmt samkomulagi aðila. Nýjasti heilsuleikskólinn er Urriðaból í Garðabæ sem opnaði í september 2022 og til stendur að opna annan þar í byrjun árs 2024,“ útskýrir Kristín Margrét.

Gera heilbrigða lífshætti að lífsstíl til framtíðar

Allir skólarnir starfa eftir sérstakri heilsustefnu. Markmið heilsustefnunnar er að auka gleði og vellíðan barna með áherslu á næringu, hreyfingu og sköpun í leik og að venja börn strax í barnæsku við heilbrigða lífshætti með það í huga að þeir verði hluti af lífsstíl þeirra til framtíðar. Að sögn Kristínar má rekja upphaf stefnunnar til þróunar- og samstarfsverkefnisins European Network of Health Promoting Schools sem hófst sem samstarfsverkefni Alþjóðaheilbrigðismálastofnunarinnar, Evrópuráðsins og Evrópusambandsins árið 1992. Frumkvöðull þessarar stefnu í leikskólastarfi á Íslandi var Unnur Stefánsdóttir en hún starfaði sem framkvæmdastjóri faglega hluta Skóla ehf. í mörg ár.

Leiðandi í heilsueflandi leikskólastarfi

Kristín Margrét segir starf Skóla ehf. í stöðugri þróun og áhersla sé lögð á faglegt starf.

„Við ætlum okkur að verða leiðandi í þekkingu og aðferðafræði heilsueflandi leikskólastarfs á Íslandi, með heilsu og lífsgæði nemenda, starfsfólks og nærsamfélagsins að leiðarljósi. Til að ná þessum markmiðum settum við meðal annars viðverustefnu á sem gengur út á að starfsmenn sem eru ekki frá vinnu í sex vikur fá hálfan frídag í samráði við leikskólastjóra. Við fengum markþjálfa til að hitta alla starfsmenn fyrir nokkrum árum og erum rétt að ljúka endurmenntunaráætlun sem hefst 7. desember á þessu ári. Við störfum eftir jafnréttisstefnu og erum búin að ljúka jafnlaunavottun. Þá unnum við sérstaka áætlun með Heilsuvernd með heilsu starfsmanna í fyrirrúmi og erum með samgöngustyrk, heilsueflingarstyrki, hópeflisstyrki og námsstyrki. Fyrir nokkrum árum gerðum við átta vikna matseðil af næringarríkum mat sem allir okkar skólar nota í dag. Þetta var unnið með næringarfræðingi og í samráði við matráða okkar. Sérfræðingar í kennslu og námskeiðum mun hefja þjálfun næsta vetur fyrir alla nýja starfsmenn. Auk þess höfum við gert samning um samstarf um fagháskólanám í leikskólafræðum milli Háskóla íslands og Háskólann á Akureyri. Við teljum þetta muni styrkja starfsmenn okkar og þar með einnig faglega reksturinn á hverjum stað,“ segir Kristín Margrét.