Samstarf Samkaupa og Öryggismiðstöðvarinnar um Kaupmannsskóla

Samkaup hefur á undanförnum misserum lagt aukna áherslu á þjálfun og fræðslu til starfsmanna sinna.  Fyrirtækið endurnýjaði á dögunum samning við Öryggismiðstöðina um ráðgjöf og fræðslu vegna öryggismála. 

„Við höfum átt farsælt og árangursríkt samstarf við Öryggismiðstöðina.  Samstarfið hefur meðal annars falist í því að haldin eru regluleg námskeið fyrir starfsmenn um mikilvæg atriði er varða öryggismál.  Við ætlum að byggja áfram á þessu góða samstarfi og efla enn frekar,“ segir Gunnar Egill Sigurðsson, forstöðumaður verslunarsviðs hjá Samkaupum.

Til að ramma enn betur inn áherslu Samkaupa á þjálfun og fræðslu er fyrirtækið að setja af stað sérstakan Kaupmannsskóla fyrir starfsmenn sína.  Samningur fyrirtækjanna felur í sér að Öryggismiðstöðin leggur Samkaupum verulega lið í hinum nýja Kaupmannsskóla meðal annars með námskeiðahaldi fyrir starfsmenn hvað varðar viðbrögð við ógnandi hegðun og annarri vá, forvörnum og skyndihjálp.