Samkaup kaupir fjölmargar verslanir á Austurlandi
Samkaup hf. og Kaupfélag Héraðsbúa hafa náð samkomulagi um kaup Samkaupa á verslunarrekstri Kaupfélags Héraðsbúa á Egilsstöðum, Neskaupstað, Eskifirði, Seyðisfirði, Fáskrúðsfirði, Djúpavogi og Borgarfirði Eystra. Þetta kemur fram á vef Ríkisútvarpsins og er vísað til tilkynningar.
Í tilkynningunni kemur fram að Samkaup kaupi fasteignir Kaupfélags Héraðsbúa sem tilheyra þessum verslunum að undanskildum fasteignum á Fáskrúðsfirði og Djúpavogi. Þá yfirtekur Samkaup ráðningarsamninga við allt starfsfólk KHB í þessum verslunum. Verslun og þjónusta við íbúa haldist óskert.
Rekstur Kaupfélags Héraðsbúa er kominn í þrot. Samkaup mun taka yfir rekstur 8 verslana félagsins og N1 tekur yfir rekstur Hraðbúða og söluskála á Egilsstöðum og Hornafirði. Ellefu starfsmönnum á skrifstofu félagsins, hefur verið sagt upp störfum.
Mynd: Stemmningsmynd af Austurlandi. Ljósmynd: [email protected]
